Tornadoes kumpiyansa sa pagbangga sa Tri Activ Spikers
Laro Ngayon
(The Arena)
2:30pm Amy vs Generika
4:30pm Cignal
vs Standard Insurance
6:30pm Petron vs Foton
MANILA, Philippines - Ipagpapatuloy ng Grand Prix champion Foton ang mainit na ratsada nito sa pagsagupa sa nagdedepensang Petron sa pagpapatuloy ng 2016 Philippine Superliga (PSL) All-Filipino Conference women’s volleyball tournament sa The Arena sa San Juan City.
Inaabangan na ang paghaharap ng Tornadoes at Tri-Activ Spikers sa alas-6:30 ng gabi ngunit magsisilbing pampagana muna ang bakbakan ng Amy’s Kitchen at Generika sa alas-2:30 kasunod ang duwelo ng Cignal at Standard Insurance-Navy sa alas-4:30.
Mataas ang kumpiyansa ng Foton matapos patumbahin ang four-time RC Cola-Army sa bendisyon ng 18-25, 25-15, 25-17, 23-25, 15-9 panalo noong Huwebes sa larong ginanap sa De La Salle Lipa Sentrum sa Batangas.
Ngunit walang puwang ang pagiging kumpiyansa sa Foton dahil alam nitong mas matinding laban ang kanilang mga susunod na haharapin.
“Masaya kami na nakuha namin yung panalo pero marami pa rin kaming dapat ayusin. Marami kaming errors, kailangan naming ma-limit yun in our next games,” ani Foton head coach Vilet Ponce-De Leon.
Humuhugot ng lakas ang Tornadoes kina 6-foot-5 middle blocker Jaja Santiago at open hitter Cherry Ann Rondina na parehong nagpasabog ng 19 puntos laban sa Lady Troopers.
Ang kagandahan sa Foton ay ang malaking suportang ibinibigay ng mga katropa nito gaya nina Angeli Araneta, Maika Ortiz at Patty Orendain na may pinagsama-samang 32 puntos.
Galing din ang Petron sa five-setter game sa kanilang huling laro.
Subalit hindi gaya ng Foton, ang Petron ay lumasap ng kabiguan sa kamay ng F2 Logistics, 20-25, 25-23, 25-22, 18-25, 8-15.
- Latest
