‘Optimus Prime’ kinuha ng Globalport
MANILA, Philippines - Magpaparada ang Globalport ng bagong import sa katauhan ni Mike Glover.
Nagpalit ng reinforcement ang Batang Pier matapos payagan ang 6-foot-5 na si Dominique Sutton na matupad ang pangarap nitong makapaglaro sa National Basketball Association.
Pinayagan ng Batang Pier si Sutton na bumalik sa United States matapos makatanggap ng imbitasyon mula sa Cleveland Cavaliers, nagpadapa sa Golden State Warriors sa nakaraang NBA Finals, para sumalang sa isang workout.
Sa nasabing workout ay oobserbahan ng Cavaliers ang laro ng 29-anyos na si Sutton, isang undrafted player noong 2012 NBA Draft at naglaro sa PBA para sa Air21 Express noong 2012.
Makaraang hindi mahugot sa drafting ay naglaro si Sutton para sa Orlando Magic sa 2012 NBA Summer League kung saan siya naglista ng mga averages na 3.2 points at 2.4 rebounds sa limang laro.
Ang 6’5 na si Glover, may bansag na ‘Optimus Prime’, ay naglaro sa Turkey, Argentina at Mexico.
Huli siyang nakita sa aksyon para sa Halifax Hurricanes sa National Basketball League ng Canada.
Kagaya ni Sutton, ang 28-anyos na si Glover ay isang undrafted player noong 2012 NBA Draft at produkto ng Iona State.
- Latest