Philippine Superliga All-Filipino Conference: Foton giniba ang Amy’s Kitchen
MANILA, Philippines – Sinagasaan ng Grand Prix champion Foton Tornadoes ang Amy’s Kitchen, 25-14, 25-7, 25-18 upang maiselyo ang ikalawang sunod na panalo kahapon sa 2016 Philippine Superliga (PSL) All-Filipino Conference women’s volleyball tournament sa Cuneta Astrodome sa Pasay City.
Humarurot si 6-foot-5 Jaja Santiago na bumira ng 15 puntos na nabuo mula sa 12 attacks at tatlong blocks para sa Tornadoes na umusad sa 2-1 rekord sa ilalim ng nangungunang RC Cola-Army, F2 Logistics at Petron na may malinis na 2-0 marka.
Kinailangan lamang ng Foton ng 63 minuto para palugmukin ang Amy’s.
Tumulong din sa opensa sina University of Santo Tomas hitter Cherry Ann Rondina at dating La Salle utility spiker Carol Cerveza na may tig-anim na puntos, samantalang may 15 excellent sets si Rhea Dimaculangan sa Foton.
Nagrehistro ng kabuuang pitong blocks at apat na aces ang Tornadoes kumpara sa isang block at isang ace lamang ng Amy’s na nagtamo ng ikatlong dikit na pagyuko.
Mababa rin ang produksiyon ng Amy’s sa attack line tangan ang kabuuang 17 lamang – anim galing kay Maribeth Lara at apat naman kay Cindy Imbo.
“We have to see all possibilities. The girls showed how well they can adapt to the changes that we’re giving. Even if that’s not their natural position, they still showed great composure,” wika ni Tornadoes mentor Vilet Ponce-De Leon.
Inihahanda ni Ponce-De Leon ang kanyang bataan para sa mas matinding labang haharapin nito sa AVC Asian Women’s Club Championship na idaraos sa Maynila mula Setyembre 3 hanggang 11.
Papasok sa lineup ng Foton sina Aby Maraño, Jen Reyes, Rachel Anne Daquis, Jovelyn Gonzaga at imports Lindsay Stalzer at Ariel Usher para sa naturang Asian tournament.
“Inihahanda ko na yung isip nila. I want them to follow my instructions and be ready for whatever possibilities, even if they need to change their natural playing positions,” ani Ponce-De Leon.
Masusubukan ang tatag ng Foton sa pakikipagtipan nito sa F2 Logistics sa Linggo sa The Arena sa San Juan City.
- Latest
