Pari: Celdran kailangang managot sa kasalanan

MANILA, Philippines – Matagal nang pinatawad ng Simbahang Katolika ang tour guide at reproductive health activist na si Carlos Celdran, ngunit kailangan pa rin niyang harapin ang mga parusang ipinataw sa kanya dahil sa kanyang protesta sa loob ng Manila Cathedral noong 2010, ayon sa isang pari.

Sinabi ni Manila Cathedral rector Monsignor Nestor Cerbo na tulad sa pangungumpisal, pinapatawad ng Diyos ang isang tao ngunit kailangan pa rin niyang panagutan ang kanyang mga ginawangh kasalanan.

"We continue to pray for him that he be enlightened. The Lord wants him to be enlightened...," ani Cerbo.

"During confession, God forgives us... But we also have to compensate for the damage done," dagdag ng pari.

Sinabi pa ni Cerbo na nakamit ng Simbahang Katolika ang hustisya sa desisyon ng Manila Metropolitan Trial Court sa kaso ni Celdran.

Ayon kay Cebu Archbishop Jose Palma, pinuno ng Catholic Bishops Conference of the Philippines, dapat irespeto ang desisyon ng korte.

"The court had spoken. Long ago we forgave him and now we respect the court decision. We have learned that respect should  be given to all religion, the court has spoken and we say amen," ani Palma.

Hinatulan si Celdran dahil sa kasong paglabag sa Article 113, Section 4 ng Revised Penal Code (RPC) kaugnay ng ginawa niyang pagpuprotesta noong Setyembre 30, 2010.

Ginawa ni Celdran ang protesta sa kalagitnaan ng misa. Bukod sa pagsigaw, may bitbit din si Celdran na plakard na may nakasulat na "Damaso" habang umiikot sa Simbahan.

Tinutukoy ng pangalan si Padre Damaso, isang abusadong pari sa nobela ni Jose Rizal na “Noli Me Tangere” at “El Filibusterismo.”

Sa inilabas na desisyon ni Judge Juam Bermejo ng Manila City Metropolitan Trial Court Branch 4, maaring makulong si Celdran ng dalawang buwan at 21 araw hanggang 13 buwan at 11 araw.