Dayan ikinulong sa Senado
Nagbigay ng kanyang pahayag si Ronnie Dayan sa kanyang ikatlong pagharap sa pagdinig ng Senado tungkol sa pagpatay kay Mayor Espinosa Sr. na kung saan ay nakaharap nito ang dating amo na si Senator Leila De Lima. Geremy Pintolo
MANILA, Philippines - Sa Senado pansamantalang ikukulong ang dating driver na naging ka-relasyon ni Senator Leila de Lima na si Ronnie Dayan matapos siyang i-contempt ng Senate committee on public order and dangerous drugs na pinamumunuan ni Senator Panfilo “Ping” Lacson.
Si Senator Manny Pacquiao ang nagsulong na i-contempt ng komite si Dayan dahil sa hinalang hindi ito nagsasabi ng totoo at pinipili lamang ang isisiwalat sa komite.
“In the meantime that he’s being held, as he’s been cited in contempt by this committee, he will stay muna at the Senate premises,” pahayag ni Lacson.
Si Senator Vicente “Tito” Sotto III naman ang nagsulong na dapat ay sa Building 14 ng New Bilibid Prison (NBP) ikulong si Dayan kung saan nakakulong ang mga sinasabing malalaking drug lords.
Inihayag ni Lacson na pag-uusapan pa ng komite at posibleng pagbotohan sa susunod na hearing kung itutuloy ang planong ikulong si Dayan sa NBP.
Pero inaasahang sa Senado mananatili si Dayan hangga’t hindi pa muling nagpupulong ang komite.
Bago magsimula ang sesyon ay sinabi ni Pacquiao na hindi niya kayang maniwala sa sinasabi ni Dayan na tanging si Kerwin Espinosa lamang ang nagbigay umano ng pera mula sa ilegal na droga.
Iginiit ni Pacquiao na mas maraming malalaking drug lords dito sa Metro Manila at nakapagtatakang kay Espinosa lamang ito makakakuha umano ng pera si Dayan.
Naunang ibinunyag ni Espinosa na umabot umano sa P8 milyon ang naibigay niya kay De Lima sa pamamagitan ni Dayan noong 2015.
- Latest
