Drug surrenderee patay sa shootout
NORTH COTABATO, Philippines – Isasailalim sa autopsy ang bangkay ng 34-anyos na drug surrenderee na napatay matapos umanong manlaban sa mga pulis sa isinagawang buy-bust operation sa Purok Ilang-ilang, Barangay New Pangasinan sa Koronadal City, South Cotabato, kamakalawa ng gabi.
Kinilala ang napatay na si Zaldy Bermudes Delos Reyes, may asawa at residente ng nasabing barangay.
Ayon kay Po/Supt. Barney Condes, hepe ng Koronadal City PNP, nasa drug watchlist ng pulisya si Zaldy at pinaniniwalaang nagtutulak ng droga.
Gayunman, ipinaliwanag ni Condes na hindi nila alam ang operasyon na isinagawa ng Police Regional Anti-illegal Drugs Special Operations Task Group at Regional Public Safety Company dahil wala umanong koordinasyon sa kanilang operasyon.
Dagdag pa ni Condes, huli na nang malaman nito ang nasabing operasyon dahil rumesponde lamang sila sa nasabing lugar matapos makatanggap ng ulat na may shooting incident umanong nangyari sa nabanggit na lugar.
Pagdating nila sa lugar ay patay na si Delos Reyes.
Napag-alaman na ang napatay ay sumuko sa Koronadal City PNP noong Hulyo 2016.
- Latest