'Three-peat' ambisyon sa Beermen

CEBU, Philippines - Gaawas karon ang kompiyansa sa San Miguel Beermen nga mahimong ikaduhang koponan sa kasaysayan sa PBA nga makahimo og “three-peat” sa Philippine Cup.

Sa kasaysayan sa liga, bugtong ang Talk ‘N Text lang ang nakasakmit og tulo ka All-Filipino Cup titles, apan nagkahayag ang damgo  sa Beermen human sila miabante sa finals niadtong Lunes. Ang Beermen maoy kampiyon sa miaging duha ka Philippine Cup.

Si reigning MVP JuneMar Fajardo nagkanayon nga mao kini ang ilang damgo ug karon nga duol na sila, buhaton nila ang tanan aron makab-ot kini bisan asa pa sa Barangay Ginebra o Star Hotshots ilang  makontra  sa finals.

Ang team captain sa Beermen nga si Arwind Santos miingon nga gusto nila nga mabuhat ang maong talagsaong kalampusan alang  sa team owner nga si Ramon Ang. (BANAT NEWS)