Banat ( Leaderboard Top ), pagematch: 1, sectionmatch: 1

Pakyas nga pangandoy

Nagdali si Edwin nga misaka sa ikalima nga andana sa usa ka building nga nahimutangan sa usa ka estasyonan sa radyo. Buot siya nga mosalmot sa odisyon kay nanginahanglan og drama talent ang maong sibyaanan.

Daghan nang mga aplikante, babaye’g lalaki sa pag-abot ni Edwin nga naghangos. Gipaliraw ni Edwin ang iyang panan-aw og nasangit ang iyang tinan-awan niadtong maanyag nga babaye nga nagsipit og folder.

Iya kining giduol. “Apil ka’g pa-odisyon Miss?” Daw nahilaw si Edwin kay wala siya tubaga sa babaye. Tagsa-tagsa sila nga gipabasa og drama script, pares-pares – babaye’g lalaki.

Dunay mga maayo unta’g tingog apan dili makadiritso og basa sa gisuwat diha sa script, ingon man kuwang sa tuno ang pagkasulti. Nakahigayon og paminaw si Edwin sa ubang aplikante kay dapit na siya sa kataposan gi-odisyon.

Lahi-lahi nga script ang gihatag kanila kay gitumong kini nga dili nila mapraktis kun unsaon pagbasa ug pagsulti. Apan masaligon si Edwin nga madawat kay dihang bata pa siya tigpaminaw siya sa drama nga Maria Flor de Luna ug Diego Salvador.

Giswerte si Edwin kay kadtong gwapa nga babaye nga wala motagad kaniya maoy gipares ni Kuya Edgar nga iyang kapares sa odisyon. Nabantayan ni Edwin nga mipahiyom ang ubang aplikante nga nagtan-aw kaniya nga maayo kaayong mibasa og mihatag og kinabuhi sa mga pulong nga gisuwat sa script.

Human sa odisyon, gikulbaan ang mga aplikante nga nagpaabot sa resulta kun kinsa ang madawat kanila. Lima ra ang kuhaon nga bag-ong drama talent.

Nahilom ang mga aplikante dihang miduol na si Kuya Edgar sa microphone. Nawad-an na og paglaum si Edwin kay sa unang upat ka ngalan wala siya maapil.

“Ang ikalima nga aplikante nga kinahanglang moanhi sa drama room ugma mao si Engr. Edwin Ugsimar,” gilingi ni Edgar si Edwin nga daw natulala didto sa daplin.

Kalit nga giduol si Edwin niadtong gwapa nga babaye nga wala maapil sa mga nadawat pagka drama talent. “Congrats! Engineer ka diay? Sorry ganina ha nga wala dayon ko motagad nimo.” “No, dili ko engineer uy, komedya ra kadto ni Kuya Edgar,” giingnan ni Edwin ang babaye. “Humble kaayo na siya uy. Ako diay si Beth.”

Gipatawag sa drama room ang lima ka palarang aplikante. Paggawas nila, nakalitan si Edwin kay diha pa si Beth. “Pamangka engineer ha kay nadawat ka gud,” nagpahiyom si Beth.

“No problem, tana,” gigunitan ni Edwin ang kamot ni Beth. (Sumpayan)

  • Follow Us: