Banat ( Leaderboard Top ), pagematch: 1, sectionmatch: 1

Hinog sa punoan

Gula 86

“Giunsa nimo pagkasayod?”

“Tagna-tagna lang,” mipakibo si Patrick sa abaga. “Dugay-dugay na gud tang nagtipon. Mao nga inanay na nakong nadiskubrehan ang imong likes and dislikes.”

Wala na motingog si Urielle. Gitibawas nila ang pagpangaon.

Nianang pagkaudto gibati si Urielle og kalaay nga mao rang usa sa balay. Nakahunahuna siyang maglingaw-lingaw. Misuroy siya sa Ayala Center. Wala siya’y planong mamalit og bisan unsa. Gusto lang siyang magpalabay sa mga takna.

Wala madugay sa pagsuroy-suroy sulod sa mall, mihilab ang iyang tiyan sa kagutom. Misulod siya sa usa ka outlet sa fastfood chain. Apan napahunong siya sa iyang paghitangka sa may pultahan. Sa usa ka lamesa nga nahimutang sa suok nga bahin sa kan-anan nasigpatan niya si Patrick. May kuyog kining babaye, si Chariz. Dili mahitabong masayop siya, si Chariz gayod ang maong babaye.

Wala makasabot si Urielle sa iyang gibati dihang nakita niya sila si Patrick ug Chariz nga malipayong nagsultihanay. Naglagot siya. Kahamagon siya sa duha. Apan gipaningkamotan niya ang pagpugong sa kaugalingon aron dili siya makahimog eskandalo.

Ingon sa kalit lang nawagtang ang gibati niyang kagutom. Midali siya paggawas sa kan-anan samtang wala pa makakita sila si Patrick ug Chariz kaniya. Migawas siya sa Ayala. Mipara og taksi ug nagpahatod ngadto sa ilang gipuy-an sa Busay. -- Sumpayan pa

  • Follow Us: