Ipa-revoke sa Filinvest ang kontrata pagpalit og yuta sa SRP

CEBU, Philippines - Gibutyag ni Mayor Tomas Osmeña nga ang kadagkoan sa Filinvest Land Inc. nakahukom na nga ilang ipa-revoke ang kontrata nga pagbaligya sa dakbayan sa Sugbo ngadto kanila og kapin sa 19 hektareyas nga kayutaan diha sa South Road Properties.

Matud ni Osmeña nga iyang naestorya si Tristan Las Marias, ang vice president sa Filinvest Land Inc. Ang mayor miingon nga iyang nahibaw-an nga nahiubos ang mga opisyal sa FLI kay wala matuman sa City Hall ang gilatid sa kontrata. Si Osmeña miingon nga gilatid sa kontrata nga sa dili pa molapas ang unom ka buwan gikan sa pagpirmahay kabahin sa pagbaligya sa yuta ug sa paghatag sa FLI sa pasiuna nga katunga sa kantidad, ang City Hall mohatag usab sa pipila ka mahinungdanong dokumento.

Ang mayor miingon nga ang administrasyon kaniadto ni kanhi mayor Michael Rama wala makatuman sa nalatid sa kontrata ug maoy rason nga ang FLI wala pa makasugod pag-develop sa property.

Ang 19.2 hektareyas nga yuta sa SRP nga napalit sa FLI, kabahin sa 45 hektareyas nga kayutaan nga gibaligya sa dakbayan atol sa hinapos nga bahin sa termino ni Rama. Ang laing 26 hektareyas nga kayutaan napalit usab sa SM-Ayala Consortium.

Sama sa FLI, ang consortium sa SM ug Ayala wala gihapon makasugod sa pag-develop sa kayutaan nga ilang napalit gikan sa dakbayan. Ang dakbayan sa Sugbo nabayaran na og kapin sa P8 bilyones nga maoy katunga sa kantidad sa pagkahalin sa 45 hektareyas.

Matud ni Osmeña nga atol sa press conference sa iyang opisina karong alas 11 sa buntag, gipaabot nga motambong si Las Marias ug manubag sa ubang pangutana sa media kabahin sa tinguha sa FLI sa pagpa-revoke sa kontrata pagpalit nila og yuta sa SRP.

Ang mayor nalipay niining labing ulahi nga kalamboan tungod kay dili na mahago pa ang mga abogado sa dakbayan sa pagpasaka og kaso sa hukmanan aron nga kanselahon ang kontrata sa pagbaligya sa yuta nga gihulagway niya nga alkanse ang siyudad.

Si Osmeña mipasabot nga barato kaayo ang pagbaligya sa administrasyon ni Rama sa maong kayutaan sa SRP sa kantidad nga P38 mil matag metro kuwadrado kay ang maong yuta sa pagka karon mabaligya na gani sa tag P110 mil ang matag metro kuwadrado.

Gani ang mayor nangayo og pagtugot sa City Council nga katugotan siya nga makabaligya og tulo ka hektareya nga yuta tupad sa gibaligya ni Rama aron iyang pamatud-an nga barato ra kaayo ang pagkahalin sa 45 hektareyas sa kantidad nga P16 bilyones.

Gusto ni Osmeña nga unya na ibaligya ang maong kayutaan sa SRP kun momahal na pag-ayo ang kantidad tungod sa pag-develop na sa maong lugar aron nga magamit kini sa mga proyekto, apil na sa paghatag og college scholarship sa mga anak sa kabus nga pamilya.

Ang mga abogado sa dakbayan ug sa FLI magtinabangay na aron mapadali ang pag-revoke sa kontrata kabahin sa pagbaligya sa 19.2 hektareyas nga yuta. Matud ni Osmeña ipauli niya ang kuwarta nga nabayad sa FLI nga wala gastoha sa siyudad. (BANAT NEWS)