Luha sa amahan

Gula 62

Pagkabati ni Carlo nga lahi ang tono sa pagkasulti sa amahan, gibati niyang nasagmuyo kini sa nakab-ot nga desisyon, mibarog ang ulitawo ug gitaparan sa paglingkud ang amahan. Mihikap sa abaga ni Arturo.

"Pa, hinaut nga makasabot ka. Sakit baya kaayo nga huna-hunaon nga ang akong mga ginikanan nagkabuwag. Wala ko magtuo nga mahisama sa uban kining atong pamilya. Mahulog nga broken family." Matud pa ni Carlo.

"Dili unta ma-ingon niini kun may halapad pang pagsabot ang imong inahan sa akong gibuhat." Matud pa ni Arturo.

"Dili man gud siguro lalim ang bati-on sa usa ka asawa nga gibuang sa iyang bana, pa." Ni Carlo pa.

""Nga sa ato pa, mas mipabor ka sa imong inahan kay nako, Carlo?" Matud pa ni Arturo.

"Dili sa ingon nga mipabor ko pa. Dili man gud parehas ang tanan nga adunay managsamang pagbati o interpretasyon. Nakasabot ko sa imong side, oo, nakasabot ko nga wala si mama nga makahatag nimo sa imong panginahanglan kay tua kini sa layo, pero gisabot ko sab si mama sa iyang gibati samtang wala siya dinhi nga aduna kay laing gikadulog." Matud pa ni Carlo.

"Ingna lang gyud nga mas mahal nimo ang imong inahan kay nako. Nga imo na lang ibaliwala ang akong pagpangga ug pag-atiman nimo." Ni Arturo pa nga milugmaw na ang mga luha kay dili siya buot nga mawala sa iyang kiliran ang pinanggang anak.

"Mahal  tika pa oy, pinangga tika.. nakita ko ang tanan nimong pagpangga nako. Bisan gani og gipasakitan ko nimo physically pero wala kini makakibhang sa dako kong respito ug pagmahal nimo kay nakita ko man ang imong pagmahal nako, ilabi na nga mibarog ka sa imong pagka-amahan dire nako. Wala ka man tuod makabarog isip ligdong bana ngadto sa imong asawa pero at least nakahatag ka’g maayong panag-ingnan sa sama nakong anak kay wala mo ibaliwala ang tanan ko'ng panginahanglan, mga panginahanglan sa anak nga ang usa ka amahan maoy makahatag niini. Good provider ka, nahibawo ko niana." Taas nga pulong ni Carlo para sa amahan nga igo usab nga makapabakho kang Arturo.

“Mao na diay kini ang kataposang gabii nga ikauban ko ang akong anak." Ni Arturo pa nga wala na makapugong sa luha, mihilak kini. Kun tan-awon si Arturo physically, morag dili makamaong mopatulo sa luha, pero kun bahin na gani sa anak, humok pa sa mamon ang kasing-kasing ug daling makapatubod sa luha gikan sa mata aron modagayday kini sa aping sa amahan nga nagpangga sa anak sa hilabihan.

"Ayaw lang kabalaka pa, duawon ta man  ka dinhi matag karon ug unya." Matud pa ni Carlo.

"Ug kun did-an ka sa imong inahan sa pagduaw nako?" Pangutana ni Arturo nga mitutok sa anak. Mitan-aw usab sa panagway sa amahan si Carlo ug wala niya kapugngi ang gibati, misamot ang kalooy niya sa amahan, kay ang ngabil niini nagkurog samtang ang luha way hunong sa pag-agas. Tungod sa kalooy niya sa iyang amahan, migakos kini.

"Ayaw na paghilak pa gud. Duawon lagi tika. Sundon ko lang una si mama sa iyang gusto." Matud pa ni Carlo. Gikuha ni Arturo ang bukton nga mibalikos kaniya, mitan-aw sa tv nga ang huna-huna wala sa salida. Nanghupaw.

"Dihang diha ka pa sa sabakan sa imong inahan, dihang pagkasayud kong nagsabak si Gina nimo,walay kabutangan sa akong kalipay. Mora'g ako na ang labing malipayong lalaki sa tibook kalibotan niadtong tungora. Sa dihang gipanganak ka, way puas ang pagsige ko'g sud-ong sa panagway sa akong anak nga naa sa nursery, nagsud-ong nga mapahiyomon diin ang luha midagayday tungod sa gibating kalipay. Unang higayon nga gikugos ko ang usa ka anak nga akong gipangandoy, mora kog nakadaug sa lotto, dili hisabtang kalipay ang akong gibati niadtong tungora. Nagsige'g tulo ang luha, apan luha sa kalipay..." mihunong si Arturo, nagpundo og hangin kay mihuot ang dughan. Medyo nabalaka si Carlo sa amahan tungod  sa pagbakho niini. (Sumpayan)