Nanay na ‘tulak’, anak na courier, 5 pa, timbog sa drug operations
MANILA, Philippines - Arestado ng pulisya ang 7-katao kabilang ang isang ginang na umano’y big time na ‘tulak’ ng droga at anak nitong menor-de-edad na isa namang drug courier sa isinagawang operasyon, kamakalawa ng gabi sa Pasay City.
Kaugnay nito tinatayang aabot naman sa P.3 milyong halaga ng shabu ang nasamsam sa naturang operasyon.
Kinilala ni Police Senior Insp. Maynard Pascual, ng Pasay City Police ang mga nadakip na suspect na sina Angelita Bongat, 35; anak nitong si alyas Ian, 17; Ruelito Gueñez; Enrique Taylo, 50; Edgar Alarcon, 37; Rocky Fajardo, 30 at Anthony Almerante, 39.
Sa report ng pulisya, alas-10:30 ng gabi ng maganap ang insidente sa Brgy. 184, Maricaban ng naturang siyudad kung saan unang sinalakay ang bahay ni Guenez sa panulukan ng Everlasting at Sampaguita Sts., ng naturang siyudad.
Matapos maaresto ni Guenez at inginuso nito si Bongat na siyang kinukuhan niya ng droga kung kaya’t nagsagawa ng follow-up operation ang mga pulis sa bahay ni Bongat.
Sa mismong bahay pa ni Bongat naaktuhan ng mga awtoridad ang iba pang suspect na gumagamit ang mga suspect kaya kaagad nilang dinakip ang mga ito kabilang ang ginang na sinasabing isa umanong ‘big time drug pusher’ habang ang anak naman nitong menor-de-edad ay nagsisilbing courier.
Umaabot naman sa 150 gramo ng shabu, na ang kabuuang halaga ay nasa P300,000 ang nakumpiska mula sa mga suspect, na ngayon ay nahaharap sa kasong paglabag sa RA 9165 o Dangerous Drugs Act of 2002.
- Latest
