Sa mata binaril bayaw patay

MANILA, Philippines - Patay ang bayaw ng isang barangay kagawad sa Caloocan City kamakalawa ng hapon matapos itong barilin ng huli sa hindi pa malinaw na dahilan.     

Nakakulong na ngayon sa Caloocan City Police ang suspek na si Emilio Salafranca, 50, kagawad ng Brgy. 175, nakatira sa #11 Mount Samat St., ng naturang siyudad.

Dead-on-the-spot naman ang biktimang si Joseph Espinosa, 55, mister ng ate ng suspek sanhi ng tama ng bala sa kanang mata buhat sa kalibre .45 pistol.

Ayon kay Police Senior Supt. Chito Bersaluna, hepe ng Caloocan City Police, naganap ang pamamaril dakong ala-1:00 ng hapon sa labas ng bahay ni Salafranca ng naturang lugar.

Dumating umano ang biktima sa bahay ng suspek at naghamon ito ng away at sinira pa umano nito ang gate.

Hinarap ni Salafranca ang biktima nang may bitbit na itong isang kalibre .45 na baril at agad nitong pinaputukan ang biktima dahilan ng agad nitong pagkamatay.

Samantalang si Salafranca ay kusang-loob na sumuko sa mga pulis at isinuko rin nito ang baril na ginamit niya sa pagpatay sa bayaw na si Espinosa.

Narekober naman ng mga pulis sa beywang ng nasawing si Espinosa ang isang kalibre .38 baril.

Iniimbestigahan pa ng pulisya ang insidente dahil hanggang sa ngayon ay hindi pa nagsasalita ang suspek hinggil sa motibo nito.