Bag-ong rules sa CSBT ipatuman karong adlawa

CEBU, Philippines - Si Gobernador Hilario Davide, III nipahimangno sa katawhan nga mag-amping sa ilang pagbiyahe sa pagpauli sa tagsa-tagsa ka probinsiya aron magsaulog sa adlaw sa mga santos ug kalag.

Matud niya nga karong panahona mao ang panahon sa pag-ampo alang sa mga kalag sa mga nitaliwan na ug higayon usab sa paghinulsol.

Ang gobernador nanghinaot usab nga unta andam na ang Cebu South Bus Terminal (CSBT) sa pagdagsa sa mga pasahero.

Nasayran nga ang CSBT nigama og mga bag-ong rules sa pagsiguro nga hapsay ug organisado ang operasyon sa terminal ug alang sa siguridad sa mga pasahero.

Ang operation’s manager sa CSBT nga si Joey Herrera nanghinaot nga ang bag-ong ipatuman nga rules makatabang unta nga dili mohuot ang dagan sa trapiko sulod sa terminal. Matud ni Herrera nga gibana-banang moabot ngadto sa 30 mil ka pasahero ang modagsa sa CSBT ug moabot ngadto sa 700 ang gidaghanon sa biyahe gikan sa Oktubre 29 hangtud sa Nobiyembre 1. Sugod karong adlawa hangtud sa Nobiyembre 1 ipatuman nila ang passenger traffic flow plan diin sa maong plano, ang CSBT nagbutang og duha ka dagkung holding areas duol sa bus entrance ug exit gates aron ma-accommodate ang daghang pasahero nga maglinya aron malikayan nga moabot ngadto sa gawas ang linya.

Ang maong duha ka main passenger entrances accessible sa mga priority passengers sama sa senior citizens, mga mabdos ug persons with disability diin usa lang ka miyembro sa pamilya ang tugotang mokuyog kanila sa main entrance.

Dunay mga signboards usab nga ipangbutang ug ang mga barker o attendants ang idestino diha sa mga entrance sa terminal nga mogiya sa mga pasahero sa ilang designated nga mga bus.

Dugang niini, ang drop-off area sa terminal diha lang sa entrance walay tugotan nga mga pribadong sakyanan ug taxi nga makasulod sa terminal.

Ug kun dunay pasahero nga nagkinahanglan og tabang sa pagdala sa ilang mga luggage o karga dunay mga personnel sa terminal nga mo-assist kanila lakip na ngadto sa mga priority passengers diin ang terminal mo-provide kanila og wheelchair kun gikinahanglan. (Brenda D. Batuto/DILT)

Adunay mga adik nga habal-habal driver

Giangkon sa kahugpungan sa mga habal-habal drayber sa dakbayan sa Talisay nga aduna gyud sila’y mga sakop nga walay lisensya ug ang uban mga adik.

Si Samuel Atupan, presidente sa Talisay Motor Riders Association (TMRA) nagkanayon nga naa sa usa ka gatos ang ilang miyembro ug sobra sa katunga niini ang mga walay lisensya ug wala sab marehistro ang ilang motorsiklo. Gani iya sab giangkon nga aduna siya’y mga sakop nga tiggamitan og ilegal nga drugas.

 Si Ret. Gen. Hiram Benatiro, pangulo sa City of Talisay-Traffic Operation Development Authority (CT-TODA) nakigtagbo sa grupo ni Atupan aron hisgutan ang maong problema. Ilang nahukman nga liwas sa adlaw sa mga kalag, ilang ilusad ang subsub ug hiniusang operasyon batok sa mga habal-habal nga wala marehistro ug wala’y mga lisensya nga drayber.

 Matud ni Benatiro nga kinahanglan gyud sa usa ka habal-habal drayber nga mag-helmet ug magbitbit og laing helmet alang sa iyang pasahero aron sikopon.

 Kinahanglan sab nga usa lang ka pasahero ang mahimong makasakay sa habal-habal. Gawas pa niana, maligo gyud ang drayber aron dili moreklamo ang pasahero nga sila bahong adlaw.

 Dugang ni Atupan nga kun mosugot ang CT-TODA, andam silang mopaubos sa random drug test aron malimpyo ang ilang organisasyon.

 Nahisgutan sab sa maong tigum ang pletehan sa habal-habal nga dili magkaparehas. Gitambagan hinuon ni Benatiro ang TMRA nga hangyuon ang konseho o ba kaha si Mayor Eduardo Gullas nga sila ilhon aron matagaan og solusyon ang hangyo sa mga sumasakay.

Kahinumduman nga buot ni Mayor Gullas nga i-regulate ang habal-habal inay nga kini wagtangon kay panginabuhi man kini. Gawas niini, adunay mga lugar ilabi na ang mga bukirang dapit nga habal-habal ra ang mahimong kasakyan. (BANAT NEWS)