Montoya, Natividad nag-una sa VMA power chess
CEBU, Philippines - Sila si Edcel Montoya ug Richard Natividad nagpabiling wa’y pilde human sa lima ka hugna aron magsawo sa liderato sa 4th VMA Power Open chess tournament kagahapon didto sa Robinsons Galleria Cebu.
Labing uwahing biktima ni Montoya si IM Kim Steven Yap, samtang si Natividad misagunson sab og lima ka daog human gipukan si Rommel Ganzon.
Sa iyang bahin, si Ronald Ganzon milampos batok ni Bryle Arellano aron magsolo sa ikaduhang dapit bitbit ang 4.5 puntos. Nagtabla sa managsama nilang 4.0 puntos silang Yap, Rommel Ganzon, NM Merben Roque, Renzi Kyle Sevillano, Yves Christian Fiel, Venancio Loyola, Felix Shaun Balbona, Mario Mangubat ug Carlos Moreno III.
Ang duha ka adlaw nga torneyo nga gipaluyohan ni CEPCA Vice President Engr. Marvyne Guardiana mogahin og P25,000 nga ganti sa mga mananaog diin ang makampiyon mobulsa og P7,000, samtang ang malandig sa ikaduha hangtod sa ikalimang puwesto modawat og P5,000, P3,000, P2,000 ug P1,000. (BANAT NEWS)
- Latest
