Ang pag-ampo sa usa ka lider-2

Inspirasyon kining ipahinungod nato sa tagsa-tagsa ka kaugalingon. Kay kun tukibon gayud, kitang tanan gitugahan sa hiyas sa pagka lider, aron pangunahan ang mga inisyatibo nga alang sa kauswagan sa kadaghanan. Anaa kini kanato, apan nagpaabot lang kita sa kahigayonan, kanus-a kita makapakita sa katakos sa atong pagka lider, nga epektibo sa pagpangunay sa kalihukan.

Karon na ug dili ugma, usik na ang pamasin sa umaabot. Pangayuon pinaagi sa pangamuyo ug pag-ampo sa Kahitas-an nga unta kita buligan sa pangindahay. Ania ang gitagik ni Bea Valoroso, nga atong gihubad, aron sa pagpalawom sa mga mensahe, nga makadulot sa kinauyokan nga galamhan sa atong pagkatawo.

* Ginoo, kining posisyon nga pagka lider nga gihatag mo kanako. Pagsalig kini nga akong obligasyon. Tabangi ako nga makahimo. Kanako daghan ang nagtutok.  Itugyan ang kahibalo nga matuman ang kaakohan. Pahinumdomi ako sa kabalaanon niini nga akong tulobagon.

* Ginoo, tabangi nga makaalagad akong masinuktanon. Sa palibot dili ko man sila masud-ong. Tabangi nga maserbihan ko nga matinud-anon nga wa’y motibo nga ang kaugalingon paburoton.

* Ginoo, himoa nga labing maayong lider. Nabaniog nga matinud-anon.

Kay kini sila sa katawhan nihit na pangitaon. Tabangi ako nga sa pagserbi dili maghinakog. Sila maoy labaw nga akong palabihon ug Ginoo, bendesyoni ako alang sa mga buot kong buhaton nga tanan mahimong malampuson, aron ngalan mo kanunay among himayaon.

Unta ang mga lider nato karon, himuon kining pasyon nga mainampoon.