Team Gastardo, Sante Barley midaog sa CELBA Cagefest

CEBU, Philippines - Midaog ang team Gastardo batok sa team Lisen, 39-34 sa CELBA First Conference basketball tournament niadtong Miyerkules didto sa Canduman Housing gym, dakbayan sa Mandaue.

Kuwestiyonabli hinuon ang maong kadaugan  kay ang team Lisen mosang-at man og protesta batok sa team Gastardo kay usa sa ilang magduduwa nga si Johnny Landiza giingong niduwa nga nakainom og ilimnong makahubog nga supak sa lagda sa liga.

Si Landiza maoy nangulo sa team Gastardo nga mikamada og 10 puntos.

Balanse ang opensa sa team Gastardo hinungdan nga milabaw sila og 19 puntos sa tunga-tungang bahin sa third period, 30-11. Apan ang team Lisen sa kombinasyon nilang Jealvan Achumbre ug team manager Gilbert Lisen milusad og makalisang nga ataki nga nakaguba sa depensa sa team Gastardo ug ingon man pagkitkit sa labaw ngadto na lang sa tres puntos, 32-35 sa nahabiling uno minutos sa duwa. Dali hinuon nga giinat sa Gastardo ang ilang labaw, 39-32 dayon na pagposte og 3-3 record.

Si Achumbre mitikdol og 15 puntos, samtang si Lisen mitimbre’g 12 puntos.

Napiangan ang team Lisen human si Merot Ygonia nakaangkon og injury sa iyang tiil sa nahabiling 6:58 sa third quarter.

Sa pasiunang duwa, ang Sante Barley miputol sa nagkadina nilang pilde human maka-eskapo bitbit ang 60-58 nga kadaugan batok sa Tion.

Grabe kaayong nakaduwa si Harvey Magale ug gipangulohan niya ang Sante Barley pinaagi sa iyang 19 puntos. Si Ahmay Lapiña miamot og 11 puntos sa Sante Barley nga karon aduna na’y 2-5 nga baraha.

Sikit  kaayo  ang duwa gikan sa  sinugdanan ug gitapos ang duwa pinaagi  sa free  throw   ni team manager Freddie Cabiluna nga miselyo sa daog sa Sante Barley.

Ang liga nga gipasiugdahan ni P/Insp. Dondon Coloscos gipaluyohan sa Silogan Ni  Gian ug ang mga duwa gipadagan ni commissioner Albert ‘Obeth’ Ramos sa abag nilang Willy Medillo ug Lloyd Chavez.

Puntos matag usa

Unang duwa:

SANTE Barley (60) – Magale 19, Lapiña 11, Apura 8, Cabiluna 8, Mahilum 3, Panilag 3, Abapo 2, Linao 2, Borbajo 2,  Suico 2.

TION (58) – Sebandal 18, Cabrera 14, Mahipos 12, Capua 7, Tion 4, Abelong 2.

Ikaduhang duwa:

GASTARDO (39) – Landiza 10, Gelbolingo 6, Villaroza 5, Navarro 4, Mahusay 4, Tantuan 3, Gastardo 3, Enad 2, Deocares 2.

LISEN (34) – Achumbre 15, Lisen 12, Ygonia 2, Damaolao 2, Roger 2, Ecot 1. (BANAT NEWS)