9 food supplements ipinagbawal

MANILA, Philippines - Nagbabala sa publiko ang Food and Drugs Administration (FDA) ukol sa pagtangkilik at paggamit sa siyam na hindi rehistradong food supplements na kumakalat sa lokal na merkado.

Sa inilabas na FDA Advisory No. ?2017-176, tinukoy ang mga hindi rehistradong food supplements na ang Natuform Beauty Breast, Sambong Food Supplement ng Home Made Herbal Product, Banaba Food Supplement ng Home Made Herbal Product, Mangosteen Food Supplement ng Home Made Herbal Product, Malunggay Food Supplement, Power Charcoal in a Capsule, Rice Germ, Zhong Hua Niu Bian Supplement at Lian Zhan Qi Tian Supplement.

Inabisuhan ng FDA ang publiko na huwag bilhin at gamitin ang naturang mga produkto dahil hindi dumaan sa pagsusuri ng mga eksperto para matiyak na ligtas ito at kalidad.

“The consumption of such violative products may pose potential health hazard to the consuming public. Food products including food supplements should not bear any misleading, deceptive, and false claims in their labels and/or any promotional materials that will provide erroneous impression on products’ character or identity,” ayon sa FDA.

Binalaan din ng FDA ang mga tindahan at iba pang establisimiyento sa pagtitinda ng naturang mga produkto hangga’t hindi nabibigyan ng angkop na otorisasyon. Mahaharap umano sa karampatang parusa ang mga negosyante at distributors na patuloy na magbebenta ng naturang mga produkto.