360 kilong pinabuthang isda nasakmit
CEBU, Philippines - Miabot ngadto sa 360 ka kilong klase-klaseng isdang pinabuthan lakip na niini mga kiyampaw ang nasakmit sa Cebu Provincial Anti-Illegal Fishing Task Force (CPAIFTF) kagahapon sa tungang gabii diha sa Barangay Guinsay, Dakbayan sa Danao.
Ang hepe sa CPAIFTF Lyndon Ruiz mibutyag nga gibana-banang moabot ngadto sa P54 mil ang presyo sa maong mga isda nga gikan sa Masbate ug gidunggo diha sa pantalan sa Pulangbato, Dakbayan sa Bogo.
Ibiyahe unta kini paingon sa Pasil, Dakbayan sa Sugbo apan na-intercept kini atol sa pagpahigayon nila og checkpoint.
Ang maong mga isda gikarga sa Kia Bongo pickup truck nga nagtangag sa plakang 090702 ug gimaneho ni Ricardo Caliza, taga Dakbayan sa Bogo.
Si Caliza gikatakdang pasakaan og kasong administratiba diha sa Fisheries and Aquatic Resources Adjudication Board (FARAB). Siya nangangkon nga igo lang siyang mikarga sa maong mga isda paingon unta sa Pasil.
Subay sa giamendahang RA 8550 nga karon RA 10654 sa Fisheries Code of the Philippines ang madakpang nagkarga og isda nga nakuha sa ilegal nga pamaagi adunay administratibang multa nga P50mil hangtud P2 Milyones; sakmiton ang mga isdang nakuha sa ilegal nga pamaagi ug suspensuhon o –i-revoke ang rehistro o lisensiya niini sa paghakot og isda.
Samtang sa kasong criminal, kun mamatud-ang sad-an mapriso og unom ngadto sa duha ka tuig ug pabayron kini og multa nga P100 mil ngadto sa P4 Milyones. (BANAT NEWS)
- Latest
