Comelec Chairman Bautista di naman pinagbibitiw
MANILA, Philippines – Nilinaw kahapon ng ilang commisioner ng Commission on Elections (Comelec) na hindi nila pinagbibitiw sa puwesto si Chairman Andres Bautista kahit may inilabas silang memorandum na kumukuwestiyon sa discord o istilo ng kaniyang pamumuno.
Sinabi ni Comelec Commissioner Christian Robert Lim, kung magbibitiw si Bautista ay tiyak na maaapektuhan ang ginagawa nilang paghahanda para sa idaraos na Barangay at Sangguniang Kabataan (SK) elections sa darating na Oktubre.
Paliwanag niya, ang gusto lamang nilang mangyari ay magkaroon ng dayalogo sa pagitan nilang mga Comelec officials upang maisaayos ang ilang mga isyu sa loob ng poll body.
Umaasa rin aniya sila na hindi pepersonalin ni Bautista ang kanilang inilabas na memorandum laban sa kanya.
Matatandaang naglabas ng memo ang anim na Comelec commissioners na kinabibilangan nina Lim, Luie Tito Guia, Rowena Guanzon, Al Perreño, Arthur Lim at Sheriff Abas.
Isyu sa nasabing memo ang pagkuwestiyon sa patuloy na pagkaantala ng allowance ng mga election officers na nagtrabaho noong May 9, 2016 national and local elections.
Una naman sinabi ni Bautista na hindi personal sa kanya ang naturang isyu at nangakong makikipagpulong siya sa mga kasamahang poll officials sa kanyang pagbabalik sa bansa. kasalukuyang nasa Japan.
- Latest