Digital system inaprub ni PNoy

MANILA, Philippines - Inaprubahan ni Pangu­long Aquino ang panukalang mag-shift sa digital system mula sa kasalukuyang analog TV broadcasting system simula sa 2015 tulad ng ipinatutupad ng 15 pang bansa partikular sa ASEAN.

Ayon kay Presidential Communications Operations Office (PCOO) Sec. Herminio Coloma Jr., pinili ng Pangulo ang Japanese standard mula sa isang panukalang European model.

Sabi ni Sec. Coloma, pangunahing konsi­derasyon dito ang built-in emergency alert system na magagamit sa panahon ng kalamidad.

Aniya, ang nasabing sistema ay magagamit daw sa telebisyon gayundin sa mobile phones sa paglalabas ng mga babala kapag may bagyo o lindol.

Kaugnay nito, inatasan ng Pangulo ang National Telecommunications Commission (NTC) na makipag-ugnayan sa Kapisanan ng mga Brodkaster sa Pilipinas (KBP) sa pagbuo ng implementing rules and regulations (IRR) bago matapos ang taong 2013.

Una nang pinag-aralan at inirekomenda ng KBP ang Japanese system dahil sa nakitang benepisyo kumpara sa European standard.

“The Philippines is joining other ASEAN member countries in switching over from analog to digital broadcasting. This is one of the significant aspects of connectivity for regional integration that is envisioned to be fully attained by 2015 with the full fruition of the ASEAN economic community (AEC) integration. The Philippines like 15 other countries has chosen to adopt the integrated ser­vices digital broadcasting terrestrial (ISDB-T) system developed by Japan. This will pave the way for digital broadcast in the entire country,” paliwanag ni Coloma.