Leonard dili na sab kaduwa
CEBU, Philippines — Dili na sab makaduwa ang bitoon sa San Antonio Spurs nga si Kawhi Leonard ug tugotan lamang siya nga makataak og balik sulod sa korte kun ugaling hingpit na nga maalim ang injury sa iyang paa.
Ang Spurs nakahukom kagahapon nga papahuwayon usa ang ilang All-Star forward ug mao kini ang iyang estado samtang nagpadayon ang iyang rehabilitasyon aron makarekober sa gihambin niyang injury.
Gipasabot ni Spurs coach Gregg Popovich nga ila kining gibuhat gumikan kay ilang gibati nga si Leonard dili pa andam nga moasdang og balik sa aksiyon ug ubos pa kaayo ang gipakita niining kompiyansa sa iyang kaugalingon.
“We didn’t feel he was ready. His confidence level wasn’t there, so we decided to give it some more time,” matud pa ni Popovich sa wala pa harunga sa Spurs ang Brooklyn Nets kagahapon didto sa Barclays Center sa New York.
Si Leonard nakapakita og aksiyon sud lamang sa siyam ka duwa sukad siya nakapalta pagsugod sa season gumikan sa injury.
Gipasalig hinuon ni Popovich nga makabalik pa og duwa si Leonard karon nga season.
Si Leonard, nga duha ka higayon gipasidunggan isip “Defensive Player of the Year”, mi-average og 16.2 puntos sa siyam ka duwa karon nga season.
Ikatulo siya sa karera pagka-MVP sa miaging tuig sunod nilang Russell Westbrook sa Oklahoma City Thunder ug James Harden sa Houston Rockets. (BANAT)
- Latest