Curry, Thomas dili pa gihapon kaduwa
CEBU, Philippines — Daw sa wala na gyu’y purohan si two-time MVP Stephen Curry nga makasangka ang iyang hometown NBA team karon nga season.
Segun sa taho sa nba.com, si Golden State Warriors general manager Bob Myers mipadayag nga hanap pas diyes panas nga makaduwa si Curry batok sa Charlotte Hornets karong adlawa.
Kahinumduman, nga nakapalta sab si Curry sa ilang road game batok sa Hornets niadtong Disyembre 6 gumikan kay duna siya’y gihambin nga angol sa tuo niyang kiting.
Ang Warriors kausa pa lamang mapilde nga wala uban kanila si Curry batok sa Denver Nuggets sa iskor nga 96-81 niadtong bisperas sa Pasko.
Sama ni Curry, wala pa sa’y klaro kun kanus-a makaduwa si Isaiah Thomas uban sa bag-o niyang team nga Cleveland Cavaliers.
Daw sa nagdanga-danga na hinuon ang pagtaak og balik sa korte ni Thomas ug timaan niini ang pagsul-ot niya og uniporme atol sa ilang duwa batok sa Chicago Bulls sa miaging semana.
Apan matud pa ni Joe Vardon sa Cleveland.com nga wala pa’y katin-awan kun si Thomas moduwa ba sa road game sa Cavs batok sa kanhi niya team nga Boston Celtics karong Enero 3.
Mahinungdanon kaayo ang maong duwa ni Thomas batok sa koponan nga nag-trade kaniya ngadto sa Cavs baylo ni Kyrie Irving. (BANAT NEWS)
- Latest