Bulldogs mikatkat sa ikaduhang dapit
CEBU, Philippines — Seryoso ang team Bulldogs sa ilang kampanya alang sa kampiyonato dihang miiskor na sab kini og dili basta-basta nga kadaogan human gilubong ang 1 Med, 114-72 sa Sunday.com 4th Conference League niadtong Huwebes sa gabii didto sa Mandaue City Cultural and Sports Complex.
Ang wa’y puangod nga Bulldogs sayo kaayong nakapanemaho sa ilang kadaogan human sila miposte og 30 puntos nga labaw sa halftime, 53-23.
Wala pa matagbaw, ila pa nga giinat ang labaw ngadto na sa 43 puntos, 94-43 nga nakapawong sa paglaum sa 1 Med.
Si Diosdado Apa Jr. mao gihapon ang nangulo sa Bulldogs nga mikabkab og 25 puntos, gisundan ni Christopher Cabahug nga mibahog og 16 puntos.
Si Ankie Antigua mihipos 15 puntos, samtang si Jojo Bonga miamot og 14 puntos sa Bulldogs nga mao na karon ang mitungtong sa ikaduhang dapit sa standing bitbit ang 5-1 nga baraha.
Ang ballclub president ug organizer nga si Camilo ‘Tata’ Nadera mitampo og 10 puntos sa maong daog.
Nausik lang ang 32 puntos ni Mariel Muñez kay ang 1 Med nasugamak na sa ikaupat nga higayon sa pito ka duwa.
Sa laing aksiyon, wala gihapo’y nakapiog sa gamhanang Don Paulo ug padayon kining nagsolo sa liderato bitbit ang 6-0 nga human sab nila gilubong ang Almons, 84-53.
Si Jandy Paradiang lang ang naka-double figures pinaagi sa iyang 14 puntos, apan maayo kaayo nga pagkabahin-bahin ang ilang iskor.
Katorse ka players sa Don Paulo ang nitampo og puntos nga nakapadaog kanila.
Kumbati pa ang aksiyon sa nag-unang duha ka kuwarter diin singko puntos nga labaw ang natala sa Don Paulo sa halftime sa iskor nga 31-26.
Sa third period na miarangkada ang Don Paulo diin ilang gilupig sa scoring ang Almons, 32-12 sa maong kuwarter alang sa ilang 63-38 sa nahibiling 10 minutos sa duwa.
Laktod pagkasulti, kontrolado sa Don Paulo ang kinatibuk-ang duwa.
Ang Almons nalagpot sa ikatulong dapit bitbit ang 4-2 record, gipangulohan ni Jeric Gonzaga nga miburak og 13 puntos, samtang si Jason Antigua mibahog og 11 puntos.
Puntos matag usa
Unang duwa:
BULLDOGS (114) – Apa Jr. 25, Cabahug 16, A. Antigua 15, Bongo 14, Nadera 10, Tan 8, Bacus 6, Carry Ygot 6, Chael Ygot 6, Palabay 5, Apa Sr. 3.
1 MED (72) – Muñez 32, Tagayong 11, Magistrado 8, Cortes 8, Yorong 6, Magistrado 4, Tejana 4, Sayson 2.
Ikaduhang duwa:
DON Paulo (84) – Paradiang 14, Fuentes 9, Naig 9, Malig-on 8, Agbay 7, R. Gallego 6, Entrampas 6, G. Antigua 5, D. Grafe 4, T. Grafe 4, Capinpin 4, Fajardo 3, D. Antigua 3, Nadera 2.
ALMONS (53) – Gonzaga 13, J. Antigua 11, Latonio 8, Mark Sanchez 5, Alivio 5, Omolon 4, Dabon 4, P. Gonzaga 2, Ejares 2, Traya 2. (BANAT NEWS)
- Latest
