Thunder daog sa Warriors
CEBU, Philippines — Sila si Russell Westbrook sa Oklahoma City Thunder ug LeBron James sa Cleveland Cavaliers maoy bida sa dihang gipilde sa ilang koponan ang tagsa-tagsa nila ka mga kontra.
Si Westbrook mirehistro og season-high 34 puntos uban ang 10 ka rebounds ug siyam ka assists aron giyahan ang Thunder ngadto sa 108-91 nga kadaogan batok sa defending NBA champion Golden State Warriors kagahapon didto sa Chesapeake Energy Arena sa OKC.
Mao kadto ang unang higayon nga gipilde sa Thunder ang Warriors sukad si Kevin Durant milayas sa OKC aron motapon sa Golden State niadtong 2015-2016 season.
Sa miaging tuig, ang Thunder nabokya sa upat nila ka panag-abot sa Warriors.
Ning higayona, si Westbrook duna na’y kaabag nga duha ka mga bitoon. Si Carmelo Anthony midugang og 21 puntos ug si Paul George miamot og 20 puntos alang sa Thunder nga miinat sa ilang record ngadto sa 8-9.
Si Durant kanunay nga gibohan sa higayon nga magkupot siya sa bola. Mitapos siya uban ang 21 puntos human mipasud og walo sa 17 niya ka itsa. Si Stephen Curry dunay 24 puntos alang sa Warriors nga nahagba sa ikalima nilang daog sulod sa 18 ka duwa.
Didto sa Quicken Loans Arena sa Cleveland, Ohio, si James mirapido og 23 puntos sa katapusang kuwarter aron pagtuboy sa Cavaliers ngadto sa kadaogan batok sa Brooklyn Nets, 119-109.
Sila si Kevin Love ug Dwyane Wade parehong miiskor og 18 puntos sa Cavs nga aduna na’y 11-7 nga baraha. (BANAT NEWS)
- Latest
