Heat miputol sa nagkadinang daog sa Celtics
CEBU, Philippines — Gipakgang sa Miami Heat ang pagratsada sa Boston Celtics pinaagi sa pag-iskor og daog 104-98 sa nagpadayong duwa sa National Basketball Association kagahapon didto sa American Airlines Arena sa Miami, Florida.
Si Goran Dragic miiskor og 27 puntos ug si Dion Waiters mikadlit og 26 puntos, apil na ang duha ka krusyal nga tres sa himalatyong segundos sa dihang giputol sa Heat ang 16 ka sagunson nga daog sa Celtics.
Midugang si Tyler Johnson og 16 puntos sa Heat nga diriyot mikolapso human miposte og 18 puntos nga labaw sa first half.
Nalubong man tuod, apan daw komportabli niini ang Celtics karon nga season. Nabiyaan sila og 18 puntos sa Oklahoma City ug Charlotte Hornets, 17 puntos sa Golden State Warriors, 16 puntos sa Atlanta Hawks ug 13 puntos sa Dallas Mavericks sa mga duwa diin sila midaog.
Hapit kini nila mabuhat og usab.
Alkansi og 14 puntos sa tunga-tungang bahin sa katapusang kuwarter, ang Celtics milusad og 13-0 run aron pagsikit niini ngadto na lang sa uno punto, 91-90 human sa free throw ni Marcus Smart sa nahibilin nga 3:14 sa duwa.
Apan si Waiters misalbar sa Heat pinaagi sa paglansang og duha ka sunod-sunod nga 3-pointers nga nakapaginhawa kanila og lawom uban ang siyete puntos nga labaw. Ang follow-up shot ni Hassan Whiteside maoy nagsilyo sa ilang daog, 99-90 sa katapusang 1:10 nga aksiyon.
Ang Heat nagbitbit na karon og 8-9 record, samtang ang Celtics nakatilaw sa ikatulo pa lamang niining pilde sa 19 ka duwa.
Nangulo sa Celtics mao si Kyrie Irving uban ang 23 puntos. Si Jayson Tatum mikadlit og 18 puntos. (BANAT NEWS)
- Latest
