‘Sweet 16’ sa Celtics

CEBU, Philippines — Si Kyrie Irving mipatuasik og 47 puntos aron hatagan ang Boston Celtics sa ika-16 niining sunod-sunod nga daog sa National Basketball Association. 

Mangtas kaayo ang dinuwaan ni Irving alang sa Celtics nga mi-rally human maalkansi og 10 puntos sa katapusang kuwarter dayon na ngadto sa pagpilde sa Dallas Mavericks sa overtime, 110-102 kagahapon didto sa American Airlines Center sa Dallas, Texas.

Apil sa impresibong salida ni Irving ang paglansang og lima ka tres ug paglangkat og tulo ka rebounds sa dihang ang Celtics nakabangon human mabiyai sa iskor nga 89-79 sa katapusang singko minutos sa regulasyon.

Wala mibahar ang abilidad ni Irving sa dugang singko minutos sa engkuwentro diin siya mipupo og 10 puntos alang sa Celtics nga mipahugot sa ilang pagkupot sa liderato bitbit ang 16-2 records. 

Ang Mavs pabiling nagkagidlay kay nakatilaw sa ika-15 nilang pilde nga giatbangan og tulo  ka daog.

Sa laing aksiyon, ang Cleveland Cavaliers  wa’y puangod nga milubong sa Detroit Pistons, 116-88 pagpakita nga nabalik na gyud ang ilang kabangis ug aron sab padayonon ang mainit nilang ratsada human nakabawi sa bati nila nga sugod.

Ang Cavs  mikulit sa   ikalima nilang sunod-sunod nga daog ug ika-10 sa kinatibuk-an sulod sa 17 ka duwa, samtang ang Pistons  adunay 11-6 nga baraha.

Si Kevin Love maoy nangulo sa Cavs uban ang 19 puntos, 11 ka rebounds ug upat ka assists, samtang si LeBron James mihipos og 18 puntos ug walo ka rebounds sulod lamang sa 27 minutos.

Dako sab og naambag silang Jae Crowder ug Jose Calderon nga nagkumboya’g 32 puntos alang sa Cavs.

Didto sa New Orleans, si Anthony Davis mikamada og 36 puntos aron aswaton ang Pelicans ngadto sa 114-107 nga kadaogan  batok sa Oklahoma City Thunder.

Ang Pelicans maisugon nga mibangon human malubong og 19 puntos sa unang kuwarter aron pagsakmit og daog nga natabonan sa pagka-ejected ni DeMarcus Cousins human gisiko niini si Russell Westbrook sa ikatulong kuwarter.

Bisan pa man sa hitabo, si Westbrook nakamaneho gihapon pagtali sa ikalima niyang ‘triple-double’ karon nga season uban ang 22 puntos, 16 rebounds ug 12 assists. (BANAT NEWS)