Tinagsip sa NBA
Suns mipabakwit sa ilang coach
Human sa tulo pa lamang nila ka duwa karon nga season, ang Phoenix Suns mipalagpot dayon sa ilang head coach nga si Earl Watson.
Gumikan niini, nalabwan ni Watson ang dili maayong rekord ni Mike Brown nga gitagak sa Los Angeles Lakers isip coach sulod lamang sa lima ka duwa niadtong 2012-2013 season.
Klaro kaayo nga dismayado ang Phoenix management sa bati nga agi sa Suns nga natiwasan human sila gimasaker sa LA Clippers, 130-88 niadtong Domingo. Sa wala pa kini mahitabo, gilat-an sila og 49 puntos sa Portland TrailBlazers.
Irving gipamulta og $25T
Si Kyrie Irving gipamulta og $25,000 gumikan sa pag-abuso niini sa usa ka fan sa Philadelphia 76ers gamit ang mahait nga mga pulong.
Ang insidente nahitabo atol sa halftime sa 102-92 nga kadaogan sa Boston Celtics batok sa 76ers niadtong Sabado. Miulbo ang kaspa ni Irving gumikan sa kalagot sa dihang gipangutana siya sa maong fan kun hain si LeBron James.
Miangkon hinuon si Irving nga iyang gisiyagitan ang fan. Siya maoy ikaduhang player nga gipamulta sa liga gumikan sa maong kalapasan sunod ni DeMarcus Cousins sa New Orleans Pelicans nga duna sa’y gikabangi nga babayeng fan atol sa ilang duwa didto sa Memphis. (BANAT NEWS)
- Latest