Yayoy andam sa dakong hagit vs. UV

CEBU, Philippines — Nakasud na tuod sila sa finals apan alang ni Raul 'Yayoy' Alcoseba wala pa mahuman ang iyang tahas isip head coach sa University of Cebu (UC) Webmasters.

Kini gumikan kay usa pa ka malisud nga hagit ang nag-atang kanila sa unahan diin ilang sangkaon ang defending champion University of the Visayas (UV) Green Lancers sa best-of-three finals series sa 17th Cebu Schools Athletic Foundation, Inc. (CESAFI) men's basketball tournament nga sugdan karong Miyerkules diha sa Cebu Coliseum.

Ang Webmasters mi-abante sa kampiyonato sa labing unang higayon sud sa unom ka tuig human gikumpleto ang ilang dominasyon sa twice-to-beat University of San Jose-Recoletos (USJ-R) Jaguars bugti sa 80-75 nga kadaogan sud sa overtime sa tinagakay nilang duwa niadtong Sabado.

Malipayon kaayo si Alcoseba sa gipakitang kahanas ug kalamboan sa abilidad sa iyang mga batos nga maoy hinungdan nga nabutang sila karon sa ilang nahimutangan.

"I'm really happy with the progress the team has made. We have improved exponentially. The boys have matured," matud pa ni Alcoseba, ang giyukboan nga winningest coach sa collegiate ug commercial basketball dinhi sa Sugbo.

Apan alang ni Alcoseba, dili pa angayan nga sila maghudyaka gumikan kay mas bug-at pa nga misyon ang sunod nilang pas-anon batok sa inilog nga Lancers.

"My task as a coach is not yet over because we still have to win two games against a very strong and well-coached UV team," dason pa ni Alcoseba.

Luyo hinoon sa iyang huna-huna, si Alcoseba nagpanikad sa dakong hagit batok sa Lancers uban ang tumong nga langkaton ang kampiyonato.

Sa kinatibuk-an sa mabulokon niyang karera nga milanat na og tulo ka dekada, si Alcoseba nakakolekta na og lima ka titulo sa tulo ka managlahing koponan.

Usa uban sa USJ-R, ang iyang alma mater, ug duha sa Cebu Doctors' College Stallions ( CDU na karon) sa dihang ang CESAFI nailhan pa nga Cebu Amateur Athletic Association (CAAA).

Sa wala pa mitapon sa UC pinaagi sa tulo ka tuig nga kontrata, si Alcoseba misakmit og duha ka korona sud sa upat ka sagunson nga pagtaak sa finals sa SWU-Phinma Cobras.

Karon gisaytan ni Alcoseba ang ikaunom niyang kampiyonato, ning higayona uban sa Webmasters.

"This is a new chapter in my coaching career. The ultimate goal is to win a championship regardless of who our opponents are. The chances will always be 50-50 because as they say, 'the ball is round'.  But I always tell my boys to believe that they will win," panapos pa ni Alcoseba. (BANAT NEWS)