Knicks mi-trade ni Melo; Moporma og 'superteam' sa Thunder uban nilang Westbrook ug Paul George
CEBU, Philippines — Duna na say mosulbong unya nga 'superteam' sa NBA. Kini human miuyon ang New York Knicks nga i-trade si Carmelo Anthony ngadto sa Oklahoma City Thunder.
Sa sayo pa, mibungat si Anthony nga mobiya lamang siya sa Knicks kon adto siya ibalhin sa Thunder, Houston Rockets o Cleveland Cavaliers.
Imbes nga mo-apil sa training camp sa Knicks, ang rota ni Anthony adto na karon padung sa Thunder diin iyang makauban si reigning MVP Russell Westbrook ug Paul George sa gilantaw nga laing 'superteam' sa liga.
Isip hulip ni Anthony, makuha sa Knicks sila si Enes Kanter, Doug McDermott ug usa ka draft pick pinaagi sa Chicago Bulls ngadto sa New York, matud pa sa kasaligang tinubdan sa The Associated Press nga nasayud sa maong kasabotan.
Ang 33-anyos nga si Anthony duna pay buhi nga kontrata sa Knicks nga mibalor og $54 million sud sa duha ka tuig.
Sulagma kaayo ang Knicks moabli sa ilang season karong Oktubre 19 batok sa Thunder diin ila nang kontra si Anthony.
Sa miaging season uban sa Knicks, si Anthony mi-average og 22.4 puntos, 25.9 rebounds ug 2.9 assists ug mipakita'g aksiyon sa ika-10 niya nga All-Star Game.
Sa iyang paghiabot sa OKC, gipanglantawan sa uban nga makab-ot na gyud sa OKC ang kalampusan nga ilang gipangandoy uban ni Anthony kay dekalibre man ang iyang makatugbang nga sila si Westbrook ug George. (BANAT NEWS)
- Latest
