Bulldogs, Lite Shipping, Flyboys naghari sa USC-NABC

CEBU, Philippines - Ang 1994 Bulldogs, 2001 Lite Shipping ug 2008 Flyboys mibangon aron sakmiton ang titulo sa ilang dibisyon sa University of San Carlos-North Alumni Basketball Conference (USC-NABC) Summer League 2 diha sa USC-North Campus gymnasium.

Silang tanan pulos nangapilde sa Game-1 sa tagsa-tagsa nila ka best-of-three series, apan mipahimulos og maayo  sa laing kinabuhi nga ilang naangkon aron pagpakurat sa ilang mga kontra.

Si Sigmund Cabrera miratsada og 17 puntos uban ang siyam ka rebounds, unom ka assists, lima ka steals ug duha ka blocks sa dihang gipatikangkang sa Bulldogs ang 1993 Dragons, 74-70 ug ingon man pagbira sa korona sa Division 1.

Sa Division 2 finals, ang Lite Shipping nagmangtas og maayo aron paglampaso niini sa 1997 Ronins, 74-55 ug ingon paglugwa niining kampiyon.

Si Antonino San Juan minabigar og 29 puntos ug 23 ka rebounds alang sa Lite Shipping, samtang si Carlo Campos miamot og 13 puntos, unom ka rebounds, upat ka assists ug upat sab ka steals.

Wala sab magpa-alkansi si Nilton Otida nga mikadlit og 22 puntos ug ingon man silang John Cabellon ug Nico Magat nga nagkumboya og 35 puntos sa dihang gitiwasan sa Flyboys ang 2002 Lions, 76 -71 aron paglabni sa titulo sa Division 3. (BANAT NEWS)