Cavs officials: way tensiyon nilang Irving ug James
CEBU, Philippines - Gisalikway sa tag-iya sa Cleveland Cavaliers nga si Dan Gilbert ug sa ilang general manager nga si Koby Altman ang migawas nga mga balita nga adunay tensiyon tali nilang LeBron James ug Kyrie Irving.
Dungan niini, wala nila gikompirma nungka nga gihimakak nga si Irving mihangyo nga magpa-trade.
“These things are fluid,” matud pa ni Gilbert kabahin sa sitwasyon ni Irving atol sa usa ka press conference didto sa ilang training facility sa Ohio.
Pipila ka media outlets sa Amerika ang mipabuto sa balita nga si Irving mipadayag sa iyang tinguha nga magpabalhin ngadto sa laing team gumikan kay gusto na niining mobiya sa anino ni James ug ingon man moduwa sa usa ka koponan diin siya’y motimon ug maoy sentro sa opensa.
Apan sa tono sa iyang gipanulti, daw wa’y plano si Gilbert nga buhian si Irving.
“We think that Kyrie Irving is one of the best guards in the NBA,” sumala ni Gilbert segun sa taho sa Agence France Presse.
Si Irving miduwa sa miaging tulo ka NBA Finals uban ni James sa Cleveland diin sila milampos pagsakmit sa titulo niadtong 2016 season.
Duna pa siya’y nahibilin nga duha ka tuig sa kasamtangan niyang kontrata sa Cavs.
Kon unsa man gani ang iyang rason nganong gusto siya mobiya sa Cavs, si Altman nagkanayon nga ang balita nga nagkasungi silang James ug Irving gipasobraan lamang ug wala kini kamatuoran. (BANAT NEWS)
- Latest
