Minglanilla nakauna sa Governors Cup South finals

CEBU, Philippines - Ang Minglanilla Archangels milusad og nagbagang opensa kortesiya ni Jiesel Tarrosa sa ikaduhang kuwarter aron pagtumba sa Dalaguete AgriSaurs, 74-68 ingon man pagposte og 1-0 nga bentaha sa ilang ‘best-of-three’ South Division Finals sa 2017 Cebu Governor’s Cup Under-21 Inter-Cities and Municipalities Basketball Tournament niadtong Biyernes sa gabii didto sa Minglanilla Sports Complex.

Mahimo nang angkonon sa Archangels ang korona kun ugaling usban nila og parot ang AgriSaurs apan angayan silang mangandam alang sa usa ka dakong gubat gumikan kay ang Dalaguete man maoy mo-host sa Game 2 karong alas-7 sa gabii.

Human sa bugnaw nga sinugdanan, si Jiesel Tarrosa mihatag og kinabuhi sa Minglanilla sa kalit niyang pagmangtas. Mikadlit siya og 16 puntos sa ikaduhang kuwarter nga nakatabang sa Minglanilla nga himuon ang 19-22 nilang alkansi ngadto na sa 47-37 nga labaw sa halftime.

Kay si Erickson Sangoyo lamang ang nanglimbasog sa ilang habig, ang Dalaguete nalubong pa ngadto sa 14 puntos. Hinuon, ang AgriSaurs nakasikit ngadto na lang sa otso puntos, 54-62 human sa 8-2 run sa nahibilin 1:38 sa ikatulong kuwarter.

Ang Minglanilla mi-inat og balik sa ilang labaw ngadto sa 12 puntos, 71-59, apan ang Dalaguete miresbak pinaagi sa 9-2 run hinungdan nga nakasikit na sab sila sa iskor nga 68-73 sa nahibilin nga 53.7 segundos.

Duna pa unta’y tsansa nga mopaduol og maayo ang Dalaguete human si Tarrosa nasipyat sa iyang duha ka free throws sa nahibilin nga 44.6 segundos, apan pakyas sila pag-iskor sa krusyal nilang posisyon.

Si Mark Glen Nebril milansang og usa ka free throw sa nahibilin nga 21 segundos, apan igo na kaayo kini pagsilyo sa kulbahinam nga daog sa Minglanilla.

Si Tarrosa mikadlit og 29 puntos sa Minglanilla, samtang si Nebril miamot og 12 puntos.

Si Sangoyo maoy nangu sa Dalaguete uban sa iyang 20 puntos, gisundan  ni Frederick John Selerio nga adunay  13 puntos. (BANAT NEWS)