Reds mipatilaw og pilde sa All-Stars
CEBU, Philippines - Mikamada og 21 puntos si Nolan de la Peña sa dihang gipatilaw sa ePerformax Reds og pilde ang Teleperformance All-Stars sa Elite Classic, 79-72, samtang ang Tech Mahindra Tech Mighties midaog batok sa QBE Generals, 61-47 sa gubat tali sa wa’y pildeng mga koponan ubos sa Evo League sa 12th CSCC E-League men's basketball tournament niadtong Domingo didto sa City Sports Club-Cebu gym.
Si Robert Gilo miamot og 19 puntos, samtang si Esrom Cuizon mitampo’g 11 puntos alang sa Reds nga nakigsawo na karon sa liderato uban sa defending champion Convergys Converters bitbit ang 5-1 nga baraha.
Ang Reds milusad og 30-15 run sa ikatulong kuwarter aron pagpakurat sa All-Stars, kansang upat ka sunod-sunod nga daog nabugto.
Sa laing duwa, si EJ Saavedra miratsada og 20 puntos alang sa Tech Mighties nga mikulit sa ikapito nilang sunod-sunod nga daog, samtang gipakgang ang pito ka sagunson nga daog sa Generals. Wala na molingi pa ang Tech Mighties human nakalabaw og singko puntos sa halftime, 26-21.
Sa laing mga duwa, si Donald Stephen mipupo og 17 puntos sa dihang gimakmak sa Author Solutions, Inc. Hardbacks ang Contact Solutions Flying Lemurs, 63-43, samtang ang Sykes Pioneers nagmangtas og maayo dayon na ngadto sa pagmasaker sa SSI Warriors, 113-63. (BANAT PALARO)
- Latest
