Raiko & Yanie Warriors mipukan sa ABZ internet cafe sa L.A. Durban cup
CEBU, Philippines - Human mahagba sa una nilang duwa batok sa Ano-os Aces, ang Raiko & Yanie Warriors madasigong mibangon sa makutas nga kadaugan pinaagi sa pagpilde sa ABZ Internet Cafe, 119-110 sa Los Amigos Basketball Tournament 2016 1st Durban Cup niadtong Miyerkules sa gabii didto sa Talit’s Garden Countryside open court sa Tayud, Liloan.
Si Topher Pilapil maoy kuyaw kaayong nakaduwa alang sa Raiko & Yanie ug gipangulohan ang kadaugan pinaagi sa iyang 32 puntos.
Laing nakahimo og maayong labok sa Raiko & Yanie ni playing team owner Rolly Cuyos mao sila si Jason Entrampas nga mihirit og 26 ug playing coach Ondong Magno nga mikamada’g 19 puntos.
Sa nag-unang tulo ka kuwarter, ang ABZ Internet ni Junjun Sabang mao ang kanunay naglabaw sa pagpangulo ni Roel ‘Boboy’ Cobrado, apan pag-entra sa katapusang dos minutos sa fourth quarter nailog sa Raiko & Yanie.
Wala na makabawi pa ang ABZ Internet, ilabi na nga migradwit si Reyden Villaronza ug wala sab makatiwas og duwa si Arnel ‘Cdu’ Pepito.
Si Boboy mikadlit og 25 puntos aron pangulohan ang ABZ Internet, gisundan ni Villaronza sa iyang 17 puntos. Laing lima nila ka teammates ang miiskor og double figures, usa na niini si Cdu Pepito sa iyang 10 puntos.
Ang Raiko & Yanie Mini Mart aduna na’y balanseng 1-1 win-loss record, samtang ang undermanned nga ABZ Internet Cafe nangiwit sa standing sa ilang 0-2 nga baraha. (BANAT PALARO)
- Latest
