Mag-agaw nga Barba 'Downhill King' sa Carcar

CEBU, Philippines - Gipamatud-an ni JR Barba sa Dumaguete City nganong siya maoy  “downhill king” sa nasud human iyang gidominar ang men’s open division sa 2016 Carcar Downhill Challenge niadtong Domingo.

Segun sa natala sa Philippines Extreme Sports Scoring System, si Barba minabigar sa malisud nga 2.5 ka kilometro nga dulhogon nga rota sud lamang sa tulo ka minuto ug 2.31 segundos.

Ang ig-agaw ni JR nga si Joey Barba sa Team Outbreak and Groundzero maoy mitapos sa ikaduhang dapit sa oras nga 3:06.07.

Ang pambato sa Oz Racing nga si Dongkey Sanchez maoy nalandig sa ikatulong dapit sa oras nga 3:11.70, samtang si Wendel Barba maoy ikaupat sa oras nga 3:15.00.

Naglangkob sa top 10 mao sila si Dave Chiong sa V12 Radgear (3:18.90), Christopher Leo Voss sa Guimaras (3:21.86), Galvin Galan (3:22.43) ug Cyril Bayawa (3:34.66) sa Outbreak, Maximo Villarta (3:34.69) sa Oz Racing ug Carlmil Oliveros (3:46.76) sa Wakaboys.

Lain pang mga mananaog uban sa ilang oras mao sila si Jonathan Verga (3:25.88) sa Idols, Rubiemar Vedua (3:13.96) sa Team Alkojholik Zamboanga sa intermediate, Lea Denise Belgira sa Guimaras (4:07.87) sa feminine ug Nover Bucao  (3:23.52) sa  JN Trailbangers sa hardtail category. (BANAT NEWS)