Katunga sa delegasyon sa Philippine team miabot na sa Brazil

CEBU, Philippines - Unom sa 12 ka mga Pinoy’ng  atleta  nga moduwa  sa 2016 Rio Olympics sunod buwan  miabot na didto sa Brazil.

Human sa dul-an 24 ka oras nga biyahe, ang mga Pinoy athletes miiskala  didto sa Brazil diin dala nila gikan sa Pilipinas ang paglaum nga makakuha og medalya sa labing dakung multi-sporting events sa kalibotan.

Ang niabot na didto sa Brazil mao ang pambato sa table-tennis ug flag-bearer nga si Ian Lariba. Uban niya sila si  Elaine Alora sa taekwondo, Jessie Khing Lacuna sa swimming, Marestella Torres sa track and field ug Hidilyn Diaz ug Nestor Colonia sa weightlifting.

Kini ang ikatulong Olympics nila ni Diaz ug Torres, samtang ikaduha ni Lacuna.

Sa laing bahin, ang katunga sa Philippine delegates diin uban sila si  boxers Rogen Ladon ug  Charly Suarez,  runner Eric Cray,  swimmer Jasmine Alkhaldi, golfer Miguel Tabuena ug Cebuana Mary Joy Tabal gikatakdang moabot sunod semana. Si Tabal adto manukad gikan sa Japan diin siya kasamtangang nag-ensayo. (BANAT PALARO)