Casals Village summer caging mosikad na

CEBU, Philippines - Siyam ka teams ang magbugno sa kampiyonato sa 2016 Casals Village Summer Basketball League nga mosikad na karong adlawa diha sa Casals gym sa Barangay Mabolo, dakbayan sa Sugbo.

Sa dili pa ang kumbati, usa ka simpleng seremonyas sa pagbukas ang ipahigayon sa ala-1  sa hapon nga pagatambongan ni US-based Cebuano NBA trainer/coach Jefferson Codera Jr. 

Si Codera miyembro sa training camp sa reigning NBA champion Golden State Warriors ug lisensiyadong coach sa USA Basketball ubos sa Youth Development Program niini.

Makigduyog ni Codera mao ang mga opisyales sa Casals Village Homeowners Association nga maoy nagpasiugda sa maong torneyo ubos sa pagtambayayong sa San Remigio Properties.

Tulo ka mga duwa ang gikatada karon ug mahibaw-an kini human sa opening.

Ang mga entranteng koponan naglangkob sa San Remigio Properties, Dexlab Disciple, ASPA, Prycegas, Casals Village Power House, SG Arq Builders, Energen, Ateneo de Cebu Blue Eagles ug Gaisano Capital.

Moduwa sila ubos sa single round robin format diin ang Top 4 moabante ngadto sa crossover semifinals. 

Ang top two qualifiers magabaton og twice-to-beat incentives. Ang mga mananaog magsangka dayon sa knockout finals.

Ang makampiyon modawat og P15,000, samtang ang mopahiluna sa ikaduha ug ikatulong dapit mobulsa og P10,000 ug P5,000. (BANAT NEWS)