Nietes andam sa WBO title defense

CEBU, Philippines - Misaad si WBO light flyweight king Donnie ‘Ahas’ Nietes (37-1, 21KOs) nga mohimo og impresibong performance sa umaabot  niyang title defense batok ni former Mexican world champion Raul ‘Rayito’ Garcia (33-3,23KOs) sa main event sa “Pinoy Pride 36:  A Legend in the Making” fight card sa Mayo 28 didto sa University of St. La Salle Coliseum sa Bacolod City.

Ang longest reigning Filipino world champion nangandam sa laing lisud nga hagit batok ni Garcia, ang kaluha ni Ramon kinsa gipilde ni Nietes pinaagi sa unanimous decision lima ka tuig ang milabay alang sa susamang bakus didto gihapon sa Bacolod City.

“Mura’g pareha ra na sila og style sa iyang igsuon,” matud pa ni Nietes atol sa press launch kagahapon didto sa The Social sa Ayala Center Cebu. 

“Naglisud ko atong among away sa iyang igsuon (Ramon) kay dili ko 100% mentally pero lahi karon kay andam kaayo ko.”

Ang kanhi WBO ug IBF minimumweight champion nga si Garcia wala pa katilaw og knockout nga kapildehan sa tibuok niyang boxing career, apan ang ALA star plano nga maoy mahimong labing unang boksidor nga makapaundang sa lig-ong Mehikano.

“Gusto gyud ko og knockout. Mangita ko og knockout aning awaya,” matud pa sa garbo sa Murcia, Negros Occidental.

Ang 33-anyos mikab-ot na sa labing taas nga bahin sa iyang karera isip usa ka two-division world champion, apan pabilin siyang gutom sa kalampusan. Si Nietes mipadayag sa iyang kusog nga tinguha nga mosaka sa mas bug-at nga flyweight division aron sangkaon si reigning WBO ug WBA champion Juan Francisco Estrada.

Sa supporting bout, ang former two-time world title nga si Milan ‘El Metodico’ Melindo (33-2, 12KOs) nagpangagot na nga mobawos ni  former world champion  Javier ‘Cobra’ Mendoza (24-3-1, 19KOs) sa ilang rematch.

Si Melindo napilde sa una nilang sangka ni Mendoza pinaagi sa 6th round technical decision niadtong miaging tuig alang sa IBF light flyweight title didto sa Mexico, apan kompiyansa siya nga mao nay modaog sa ikaduha nilang panag-abot.

Mahinungdanon ang daog alang ni Melindo tungod kay usa kini ka IBF title eliminator diin may kahigayonan siya nga moaway pagbalik sa IBF belt nga kasamtangang gihuptan ni  Akira Yaegashi sa Japan.

Sa undercard, si  ‘King' Arthur Villanueva (28-1, 14KOs) makigsangka usab sa laing Mexican nga si  Juan Jimenez (22-9, 15KOs) sa usa ka 10-round non-title bout ubos sa super flyweight division. (BANAT NEWS)