EDITORYAL - Honest mistake

Wa’y kurat nga miatubang si kanhi presidente Benigno “Noynoy” Aquino sa Senado atol sa nagpadayong imbestigasyon sa kontrobersiya sa Dengvaxia vaccine. Sukwahi sa gipaabot sa mga kontra sa “dilawan,” wa mahitabo ang gusto nilang makita nga magkangakanga si Aquino sa pagtubag.

Kalmado ug klaro kaayo nga natubag sa kanhi pangulo ang mga pangutana kabahin sa P3.5 bilyones nga pagkapalit sa maong bakuna. Daghan ang mga namasangil nga adunay iregularidad sa pagkapalit niini, apan hangtud karon wa’y ebidensya nga naladlad aron makasuporta sa maong mga alegasyon.

Ang World Health Organization miklaro nga wa sila mohatag og rekomendasyon, apan may giluwatan kini nga lagda bahin sa paggamit niini. Ang guidelines ba sa WHO pwede na nga himuong basehan aron gamiton ang maong bakuna bisan og dili pa kini proven and tested?

Ang mga kanhi opisyales sa DOH sa Aquino administration igo ra nga mi-testing  sa maong bakuna, ilabi na nga pwerteng daghana na ang nangamatay nga mga bata tungod sa maong sakit. Mabasol ba sila tungod sa ilang gihimo? Mahimo ba silang pakasad-on nga para man kadto sa kabataan nga nabutang sa peligro tungod sa dengue?

Sala ba diay nila kon ang WHO wala moisyu og rekomendasyon ug guidelines ra ang gipagawas nila isip tamdanan sa mga nasud kon mogamit sa Dengvaxia? Dili ba ang Sanofi Pasteur usa ka pribadong kompaniya, ug negosyo ang paghimo niini og research, eksperimento ug pagbuhat og mga medisina kontra sa mga sakit?

Mao tingali ni ang rason kon nganong wa morekomendar ang WHO sa Dengvaxia kay kon ila kining buhaton, ingon sa may gipaboran sila nga pharmaceutical company.

Apan wa kini magpasabot nga dili epektibo ang tambal, kaso lang may pasidaan sila nga basin og moresulta kini sa mas grabeng dengue strain sa nabakunahan nga wa pa sukad masakit og dengue. Dili ba kaha tinuod ang pangagpas ni Duterte nga basin og honest mistake ang nahitabo? Kon mao ni, unsa pa may gisigehan og kulitog diha sa senado?