Pagamay nga wa nay ehersisyo (1)

Sayo sa buntag  daghan ko'g makita sa dapit duol sa among pinuy-anan sa may Ayala parks malantaw lang ang mga nag-ehersisyo nga nag-iyahay lag diskarte mababaye'g lalake. Dunay nag-ambak-ambak, nagsige'g  balik-balik sa paglakaw, nagdagan-dagan, nag-trawler nga may sakay’ng bata, nagbisekleta, nag-jogging,  jumping rope ug uban pang pasingot para paabtik ug pagamay.

May nakakuryuso sa akong panan-aw kadtong batan-on nga grabe na katambok apan angayan sa iyang barug. Nga maingon natong usa ka seksing cute kay kurbadahon man gihapon ang porma sa lawas bisa'g kini tambok. Naluoy kong nagtan-aw kay gikutasan pag-ayo gikang naglakawlakaw og pipila ka gutlo. Nisamot ang kakutas, dihang molakaw-lakaw pa unta kini  wala na kaagwanta nga nipauli padulong sakay sa awto.

Nagtuo ko sa mga tawong tambok o obis, dili ganahan mag-ehersisyo kay maugtas sila sa kakapoy. Mosamot sila'g katambok  kay mas ganado na hinuon mokaon nga imbis mogamay nisamot sab kadako  ang problema. Sagad nila modangop na la'g tumar sa mga slimming pills, nga matud sa mga doctor ug sa mga eksperto niini dili ni maayo kay duna ni daghang mga dautang epekto.

Hinuon nirekomendar sila'g labing epektibong paagi sa pagpagamay, nga mao ra ang hugot nga disiplina sa kausaban sa istilo sa pagkaon. Ang nanubra nga pagkahilig sa mga mantikaon, parat ug asukar maoy nakapaburot sa lawas nga dako'g risgo sa atong panglawas.

Mao ni ron ang nakaingon sa mga nagkadaghang mga sakit sa atong panahon, sama sa atake, hayblad, kasingkasing ug uban pang di matugkad nga sakit sa kanser.