Ang sukdanan sa kalipay

Ang sagad nga gihimong panig-ingnan, sa makita sa isigkatawo, mao ang iyang pagbaton og salapi o bahandi. Mao kini ang gihimong sukdanan sa kinabuhi, aron siya magmalipayon. Dili dautan nga aduna kitay salapi, apan kana lang igo nga may magamit sa mga panginahanglan nato.

Daghan nang nahimong mga pagtuon niini, silang tanan nakadiskubre  nga  ang kadaghanan  ang naghinubrang salapi mao pa'y nahimong hinungdan sa pagtumaw sa daghan nilang mga problema. Unsaon, dili naman makakita sa maayong padulngan, kay ang katigayonan mao na'y momando sa kaugalingon. Sa ato mismong mga kasinatian, aduna ta'y mga suod nga higalang  milyonaryo. Sa mga okasyon sa among panagkukabildo, mopabuhagay sila sa kakapoy nga ingon sa maugtas sa kadato, kay dili na ka pahuway nga permi gidiktaran nga palihukon, aron mas tukawan pang padaghanon ang salapi.

Miingon siya kanako nga ingon sa pakonsuylo nga maayo pa kuno kitang mga pobre kay malipayon man bisa'g nagnihit, makita sa dagway nga wala magping-it. Ang mga adunahan nasina kanatong mga pobre, kay wa masandig ang kalipay sa mga butang, kun dili diha sa gugma, pagminahalay nga nakig-unong nga palambuon pagsinabtanay aron lig-unon ang iyang panimalay.

Busa, di angay ikamahay nga kita pobre sa bahandi kay dili katumbasan ang kadato sa atong kasingkasing, nga maoy mopapitik sa tiunay nga kalipay. Maghangad kitang mapagarbuhon sa atong kahimtang ngadto sa Kahitas-an, kay ang Dios kanunay ang nagtutok nga kahatagan kita'g malungtarong kalipay.

Matud sa Dios ngadto sa mga bahandianon, kun buot mosulod sa langit nga angkonon ang tuboran sa kalipay nga wala nay kasakit, ipamahin ang bahandi.