Epektibo nga pagtigum

Kabahin kini sa pinansyal nga estratehiya, nga kinahanglan maantigo kita modumala sa atong kita ug sa mga gastohonon.

Daghan ang wala lang kaayo  magpakabana niini, kay basta unsay dawaton kini aron gastohon. Aduna say uban naninguha baya  nga mabansay pag-ayo sa epektibo nga pagtigum.

Pipila sa atong napanid-an, halos masaypan na lang nga tihik o kuripot, kay mao lang ang permi sa hunahuna ang pagtigum, apan dili maantigo modumala sa mga tinigom, kay imbis moburot na unta, inanay kini'ng nagkahiyos. Dili lang tuyoon nga ambot, maanam sab magamit sa mga sitwasyon nga dili kabalibaran.

Mao kini ang reyalidad sa kinabuhi, nga mentras may kusog kita, tinguhaon gyud makatigom nga bisa'g kulangon, mogahin gyud nga dili patental sa bisan unsay ihunghong sa hunahuna. Seguroa lang ang pagtigom, nga dili mausik  ang paghago nga malungtaron kini nato kapahimuslan.

May higala kong dili basta ang pagkamilyonaryo, kay iyang mga kita, sa mga transaksyones lang sa kontrata sa konstraksyons dinhi sa atoa ug sa laing mga kanasoran, kanunay siya magsawod nga mag-awas sa daghang milyones nga ganansya. Dili na maato ang pag-ihap sa kabililhon sa iyang bahandi.

Naadik nga permi bese sa pag-atiman sa mga kasosyo, wa na kaalinggat nga naulipon na sa mando sa salapi, nga naglunang sa mga bisyo, pinasagdan ang kaugalingon sa pagpatuyang.

Nagkadako ang tinigom alang sa pagpalapad sa kaugalingon. Apan inanay nawad-a'g gahum sa pagdominar sa katigayonan niya.

Niya pa, usa ka higayon niana, gipahiamgo siya pinaagi sa damgo, ingon sa gitugahan siya og kahibalong langitnon. Nalamdagan ug dinhi natugkad niya, nga angay magtigum kita'g langitnong bahandi, aron gamiton sa pagsunod sa kabubut-on sa Kahitas-an, nga maoy tinubdan sa kusog ug kinabuhi nato.