Santos sa Malabuyoc gikawat
CEBU, Philippines - Gidudahang gikawat ang mga antique nga mga santos gikan sa kapilya nga gibutangan niini sa barangay Cerdeña lungsod sa Malabuyoc.
Si Ginang Rosario Basadre, 69, byuda, nga taga Cerdeña kinsa maoy presidente sa kapilya maoy mitaho niini ngadto sa kapolisan kagahapon.
Nasayran nga may wala hiilhing mga tawo nga misulod sa kapilya kinsa giingong maoy mipas-an sa dakong rebolto ni Saint James Apostle nga nagsakay’g kabayo, usa gamay'ng antique nga rebolto sa samang santos ug laing upat ka karaang estatuwa sa mga sundalo.
Sumala pa ni Basadre nga dihang mibisita siya sa kapilya niadtong Disyembre 4, 2009 nakita pa niya didto ang mga rebolto.
Nahibaw-an na lang niya nga nawala na ang maong mga karaang larawan human siya makadawat og taho gikan sa mga molupyo sa maong lugar nga mitaho kaniya nga nawagtang na ang mga larawan sulod sa ilang kapilya.
Ang pagkawagtang niini gituohan nila nga nahitabo gikan niadtong Disyembre 5 ngadto sa Disyembre 8 niining tuiga.
Sa pagkakaron padayon pang gisusi sa kapolisan ang maong hitabo. - Bryner L Diaz (BANAT NEWS)
- Latest
- Trending