Banat ( Leaderboard Top ), pagematch: 1, sectionmatch: 1

Gagmay’ng coop tabangan sa Kapitolyo

CEBU, Philippines — Tabangan sa Provincial Cooperative Office ang mga kooperatiba sa lalawigan nga maka-comply sa upat ka rekisitos sa Cooperative Development Authority (CDA) aron mahatagan og accreditation ug exemption sa buhis.

Kini ang tumong sa PCO sa pagduso og P9.1 milyones nga budget alang sa tuig 2018 gikan sa P3.7 milyones karong tuiga.

Ang probinsya adunay gibana-bana nga 400 ka kooperatiba apan kapin 300 niini ang wala pay accreditation gikan sa CDA.

Matud sa tigpamaba sa PCO, Genero Tajanlangit, nga importante nga ma-accredit sa CDA ang usa ka kooperatiba aron sila mahatagan og Certificate of Compliance (COC). Kung may COC na, mahimo na silang malibre sa buhis ug makadawat og mas dali nga hinabang gikan sa gobiyerno.

Ang mga rekisitos mao ang mga seminars ug bansay-bansay sa fundamentals of cooperatives, good governance, gender and development, ug internal audit nga kinahanglan tambungan sa mga opisyal sa kooperatiba. Matud ni Tajanlangit nga labing gihatagan og pagtagad sa ilang buhatan ang mga micro-coops diin aduna lay P3 milyones paubos sa ilang budget-based.

Nakita ni Tajanlangit nga dili makatambong ang mga opisyal sa mga micro-coops sa mga pribado nga mga seminar tungod sa kamahal niini.

Sa pagkakaron adunay siyam ka lugar sa probinsya ang target sa PCO nga hatagan og libre nga seminar nga mao ang Sibonga, Dumanjug, Toledo City, Danao City, San Remigio, Bantayan, Camotes, Carcar City ug Naga City.

Gipasabot ni Tajanlangit nga gawas sa libre nga buhis ug tabang sa gobiyerno, importante sab ang pagpahigayon sa mga bansay-bansay sa mga opisyal aron kanunay mapahinumduman ang mga kawani sa kooperatiba sa angay nga ihatag nga serbisyo sa mga miyembro ug pagpakita sa gugma sa ilahang trabaho. (BANAT NEWS)

  • Follow Us: