Gipusil sa videokehan kritikal
CEBU, Philippines - Kritikal ang kahimtang sa usa ka habal-habal driver nga gipusil sa videokehan sa nag-helmet nga lalaki sa Sitio Landing, Barangay Catarman, Lungsod sa Liloan alas 4 pasado sa niaging kadlawon.
Si Police Superintendent Melbert Glade Esquerra nga maoy hepe sa Liloan Police Station niila sa biktima nga si Jomel Pagobo Caya, 31- anyos nga nagpuyo sa maong dapit.
Matud ni Esquerra nga kuyog sa biktima ang iyang mga barkada nga nag-inom ug nagkanta-kanta sa Concordia Videoke nga nahimutang sa maong dapit dihang nahidangat ang wala hiilhing lalaki nga nagsakay sa Honda nga motorsiklo.
Ang backrider maoy nagdali sa pagkanaug sa giluwanan nga motorsiklo ug niduol dayon pusil sa biktima sa makadaghang higayon nga nakaingon sa grabe nga pagkaangol.
Human sa pagpamusil ang duha ka wala hiilhing lalaki ang dali nga nisibat sakay sa motorsiklo ug ang biktima dali nga gidala sa Liloan Municipal Health Center.
Tungod kay grabe ang kahimtang dali kining gibalhin sa Vicente Sotto Memorial Medical Center sa Dakbayan sa Sugbo. (BANAT NEWS)
- Latest