Anak patay, amahan angol sa truck

CEBU, Philippines - Patay ang 21-anyos nga lalaki human kini nalabay sa gimanehong motorsiklo nga gibanggaan sa usa ka truck sa National Highway, Uling, Dakbayan sa Naga niadtong Huwebes sa gabii.

Patay na nga nadangat sa tambalanan ang drayber sa usa ka motorsiklo nga giila nga si Erwin Libre Magallon, Jr., 21, samtang naangol ang niangkas niyang amahan nga si Erwin Canillo Magallon, 52, pulos residente sa Barangay Cabitoonan, Dakbayan sa Toledo.

Sumala pa sa imbestigador sa traffic section sa Naga City Police Station nga si PO3 Keith Nuñeza nga gikan ang duha sa Dakbayan sa Sugbo ug padulong na unta manguli.

Sa dihang nagsubay na ang motorsiklo sa dalan sa Barangay Uling, nakadungan ang usa ka dump truck nga gimaneho sa usa ka Laurencio Alenabon, 35.

Matud ni Nuñeza nga pag-abot sa likoon ug tungason nga bahin sa maong dalan, wala na nabantayi ni Alenabon nga nabanggaan diay sa luyong ligid ang nagmotor nga silang Magallon.

Ang duha ka sakay sa motorsiklo nangalabay ug nalagpot sa kanal ang motorsiklo nga nahimutang sa daplin sa dalan.

Dali nga gidala sa South General Hospital ang duha apan gideklarar sa doktor nga si Dr. Ian Klint Nallano nga patay na si Erwin samtang dali sab nga nitahan si Alenabon sa kapolisan.

Apan gibutyag sa imbestigador nga nakig-areglo ra ang pamilya sa biktima ug walay kaso nga ipasaka batok niini. - /GMR) (BANAT NEWS)