NNC motabang sab sa mga nisurender
CEBU, Philippines - Andam ang National Nutrition Council nga motabang sa mga drug pushers ug users nga motahan sa ilang kaugalingon subay sa Operation Oplan Tukhang sa kapolisan.
Kini ang gitug-an ni Dr. Parolita Mission, ang nutrition program coordinator sa NNC-7.
Matud ni Mission nga andam sila motabang kung unsa ang mga gikinahanglan aron mahatagan kini og tukmang human interventions ilabi na kung dugay na silang naulipon sa drugas.
Sumala pa ni Mission nga gusto nilang masayran gikan sa mga nisurender kung kumusta ang kasamtangan nga panglawas ug nutrition status aron ilang mahibaw-an kung unsa nga programa ug serbisyo nga mahatag sa NNC.
Gitug-an ni Mission nga gusto sila masayud kung unsa ang nutrition assessment condition sa mga tawo aron ilang mahimoan og mga pamaagi pinaagi sa pagpakig-alayon sa Department of Health.
Andam ang NNC makig-alayon sa tanang ahensya ug bukas sila nga motabang sa tanang gusto sa ilang serbisyo para sa mga tawo nga nisurender tungod kay ang ilang buhatan naglantaw para sa pagkaon sa lawas ug kalag.
Samtang si Arsobispo Jose Palma sa iyang bahin andam makigtagbo sa tanang ahensya sa kagamhanan alang sa paghatag og ayuda sa mga nisurender.
Matud sa Arsobispo nga atol sa sunod tigum sa kaparian, maoy iyang tinguha nga makighiusa sa tanang ahensya sa gobyerno, business ug national government organizations aron tukion ang tabang nga ihatag sa mga nitahan.
Sumala pa ni Palma nga tinguha nila karon ang pagpakig-alayon sa nagkadaiyang ahensiya aron kung adunay pamaagi nga matabangan nga ma-rehabilitate ang mga nitahan, makaandam sila og mga pamaagi. (BANAT NEWS)
- Latest
