Kapin P2M shabu, 12 ka tawo sikop sa drug bust
CEBU, Philippines - Dose ka tawo ug kapin P2 milyones nga kantidad sa shabu ang nasakmit sa managlahing mga operasyon sa kapolisan dinhi sa Dakbayan sa Sugbo, Lapu-Lapu, Minglanilla ug Dalaguete.
Sa Taboan Public Market sa Brgy. San Nicolas Proper, ning Dakbayan sa Sugbo, nasakmit sa mga sakop sa Philippine Drug Enforcement Agency (PDEA)-7 sa buy-bust operation ang P1.2 Milyon nga shabu.
Matud pa ni PDEA-7 Public Information Officer III Leia Albiar, ang subject sa operasyon mao si Claudio Branzuela Bontilao, Jr., 48. Sumala pa ni Albiar, si Bontilao makabaligya og di momenus lima ka kilong shabu kada semana base sa nakuha nilang impormasyon.
Si PDEA-7 Director Ronald Allan Ricardo uban sa mga sakop milusad og operasyon batok sa suspek ug nakuha ang usa ka kilong shabu, tulo ka cellular phones, P1,600 cash ug usa ka Nissan Sedan.
Matud pang Albiar, si Bontilao mitug-an nga gikan sa National Bilibid Prison sa Muntinlupa City ang iyang suplay.
Samtang sa Lapu-Lapu City, nasikop sa grupo nila ni Chief Inspector Mark Gifter Sucalit ug Senior Inspector Verniño Noserale, deputy chief sa City Intelligence Branch silang Felix Camero, 53; Joey Aying, 36; ug si Joseph Flor, 21, Melvin Sarmiento, 32, ug Janiel Jadman,28.
Siyam ka medium packs ug 17 ka gagmay’ng putos nga gidudahang shabu, paraphernalia, ug cash nga halin sa drugas.
Sa laing operasyon, tunga sa milyon ka pesos nga gituohang shabu ang nasakmit sa managlahing buy-bust operation sa Brgy. Obo, Dalaguete ug sa Brgy. Tungha-an Minglanilla kagahapon.
Ang mga sakop sa CIDG-7 pinangulohan ni Chief Insp. Franco Rudolf Oriol mironda sa Brgy. Tungha-an sa Minglanilla ug nasikop sila si Jayson Sabellon, Ringie Bastatas, Francisco Basabe Montecillio, Divina Mejeyo Lastimos gikan sa balay ni Ronie Engbino kinsa nakaikyas kauban ni Claire Montes.
Nakuha gikan kanila ang kapin 110 gramos nga gituohang shabu nga nagkantidad og P.5 milyon.
Samtang gironda usab sa mga sakop sa kapulisan sa Dalaguete pinanguluhan ni Sr. Insp. Dexter Basirgo ang Brgy. Obo ug nasikop sila si Joseph Aldrin Buenaflor ug si Michael Dela Pena Dibdib. Nakuha gikan kanila ang lima ka paketeng shabu ug P1,888 nga kwarta nga gituohang halin sa drugas. (BANAT NEWS)
- Latest
