Ubang vote counting machines palyado
CEBU, Philippines - Nakasugat og problema ang final testing and sealing (FTS) sa mga vote counting machines (VCM) tungod kay wala mo-function ang uban niini.
Si Provincial Election Supervisor Eliseo Labaria nibutyag nga sukad buntag hangtud udto kagahapon nakadawat sila og unom ka tawag kabahin sa maong problema.
Base sa nadawat nilang report nga duha ka VCM sa Dakbayan sa Naga ang wala mo-function; sa Lungsod sa Medellin guba ang SD card sa usa ka VCM; usa ka VCM sa Argao ang wala usab mo-function; sa Dumanjug usa ka VCM ang wala mokaon sa balota apan naayo usab dayon kini.
Si Labaria nagkanayon nga kagahapong adlawa sulbaron dayon nila ang maong problema.
Gibutyag ni Labaria nga dunay 154 ka contingency voting machines ang magamit kung dunay maguba nga VCM.
Matud ni Labaria nga niadtong unang eleksiyon ang mga Precinct-Count Optical Scanner (PCOS) machines nakasinati usab kaniadto og samang problema. Giingong ang pagbiyahe ug ang pagbalhin-balhin sa makina ang hinungdan nga dunay maguba.
Tumong sa pagpahigayon og FTS aron masuta kung duna bay deperensiya ang mga VCM nga gamiton sa eleksiyon.
Dugang ni Labaria nga sa pagpahigayon og FTS walay nasinati nga wala magkatakdo ang resulta sa balota ug resibo nga mogawas gikan sa VCM. (BANAT NEWS)
- Latest
